居安抗疫｜接線生望市民勿濫用熱線 有家長攞唔到尿片奶粉鬧足1個鐘 網民反應兩極
2022-03-25
第5波疫情下，政府設立「居安抗疫」熱線，為在家隔離的有需要人士提供支援。近日有居安抗疫的接線生在網上出post，指希望大家勿再濫用此渠道去拎物資，更有家長因攞唔到奶粉／尿片，而投訴足一小時。
這名接線生在Facebook專頁「公務員Secrets」匿名投稿，希望大家幫幫手，想清楚自己是否真的有急切需要才致電要求物資，如果可以的話，大家可以根據衞生署最新指引，在第6及7日快測呈陰性時，自行外出購物，「因為致電本中心真係有為數不少的獨居長者／七老八十的老人家／傷健人士打嚟要求物資，當多人需要送貨就會延遲」。
事主在文中提到有家長會以家中小朋友及嬰兒為由，索取奶粉／尿片等物資，如果拿不到就發脾氣或投訴足一小時，「家有小朋友及嬰兒，唔係大晒，既然有小朋友及嬰兒就更應該儲好一定的奶粉／尿片，每個做父母的都有辛酸事，大家會體諒，但不是父母們的藉口」。
其他文章：救護員 最怕連累家人疫染 太太撰文冀大眾尊重醫護：只想回家好好食餐飯
不過網民意見兩極，有人認為或者真的有濫用的情況，「唔排除小部分人係想唔用自己錢買」、「呢兩樣嘢BB有佢嘅習慣，你R到唔同牌子都未必有用」、「見過有facebook 版主，咩都R，仲要好威威咁打晒出來教人點拎到物資」、「香港好多呢啲人 ! 自私，貪小便宜，得唔到就投訴 ! 」。
但亦有網民認為事主只是接線生，又如何能判斷對方的真實情況，「真係皇帝唔急太監急 ，懶就懶啦」、「問題係中咗即刻要隔離，不如請政府俾兩日時間確診者出去買足夠糧食啦」、「講真，你只係一個接線生，你做番你嘅嘢咪得囉，你憑咩話打嚟嘅人有人濫用先？你咁都睇唔開，你有冇諗過自己適唔適合做呢份工」。
來源： 公務員secrets
