【小小豬】消滯消暑 防傷風香茅檸檬葉水
2016-05-18
帶小小豬去九龍城玩樂之後，就到我行街街嘅時候，因為九龍城一帶有好多泰式香料店，入去行下就可以買到唔少調味料。今次我又八八卦卦咁聽到店員教煲依個泰式特飲 – 香茅檸檬葉水啦！
香茅平時都係用嚟煮嘢食，我都真係冇諗過係可以煲水飲。不過店員同我地一班師奶仔傾開計，佢用半咸淡廣東話介紹話煲依個泰式特飲係好好，有助預防傷風感冒，消除飽滯同埋開胃消暑。
見佢講到咁好，材料又唔貴，加上可以又好易煲，所以就買齊材料試下啦！
用左約12支香茅、1包檸檬葉、2粒青檸同埋幾粒冰糖就得，成本都只係$25呀~
