九龍城街市面臨清拆眾藝人不捨 森美:最大件事係冇得撞明星

2022-05-27


^周潤發早年曾在街市被捕獲。

被稱為一代「明星街市」的九龍城街市,在今日市建局公佈的重建計劃中,即將面臨清拆的命運,之後在興建的新大樓中將會安排重置。由於九龍城街市附近有不少泊車位,因此一直以來有不少藝人偏愛到該處買餸,方便他們駕車購物,當中曾幫襯的天王巨星有周潤發、林青霞、劉青雲、方中信及導演杜琪峯等。另外,羅樂林、肥媽Maria Cordero及住在附近的蔡國威也是該街市的常客,而位於附近廣播道的商台,不少DJ及幕後人員也會往街市的熟食檔食晏,因此不少市民買餸時間中也會野生捕獲一眾明星,難怪森美今日回覆《頭條日報》笑謂:「冇咗好唔方便,買嘢事少,撞明星事大,嗰度好多明星,俾啲買餸太太人生小趣味,真係唔捨得。」

另外,羅樂林回覆《頭條日報》時也表示:「冇收到消息,最近疫情通告(開工)密咗,以前一個月去25日,依家可能一個月去一次。」羅樂林是九龍城的老街坊,幾乎由1988年街市落成已開始幫襯,他續說:「真係幫襯坐底30年,我以前住書院道附近,即使後來搬咗去太子道,但都係會去番九龍城街市買餸,呢啲都係情意結,全部都係街坊,好熟絡,大家好似鄰居一樣,我去到,佢哋都知我鍾意要新鮮嘢,我又唔講價,好有人情味。」

 
^杜琪峯也會親身到街市買餸。


^「大龍生」羅樂林大讚九龍城街市很有人情味。

^肥媽日前才去九龍城街市買餸。

面對九龍城街市即將拆卸,雖然萬般不捨,但羅樂林覺得亦無可奈何:「都要面對,人生就係咁,時代變都要面對。」至於肥媽亦大呼不捨:「唔係呀,梗唔捨得啦,痴線啦,我呢幾日都仲係去九龍城街市買嘢。九龍城街市好多嘢賣,有好多人喺嗰度做咗幾十年!九龍城街市梗係應該要保育啦,做咗幾十年,有乜理由拆卸啫。」

陳山聰得知九龍城街市即將清拆表現愕然:「吓, 個街市對我嚟講好大回憶,因為當年爹哋一個最好兄弟喺嗰度賣雞鴨咁,我爹哋成日去佢個檔口打牌,我就跟埋成日去玩,又整雞腸同睇佢哋點劏雞,同埋個街市當日開幕我有份去做武師,真係好大回憶,點解會拆?」何廣沛原來經常光顧買火鍋材料:「好可惜,我成日去2樓買打邊爐嘅嘢食,專去一間牛肉舖買肥牛打邊爐,每次都係專程駕車去,希望可以知道去開相熟嘅舖頭有咩打算啦。」而張達倫表示疫情前不時往街市內食泰國美食,還會買魚及墨魚丸,因平靚正,希望檔主可以找到或獲安排地方重開做生意,以免影響生計。

住在附近的蔡國威表示:「舊區重建、重置呢件事,我覺得喺九龍城一定會發生,少少可惜啦,因為九龍城街市好多外區嘅人都會嚟幫襯,我呢啲街坊一定會幫襯啦!因為九龍城街市裡面有好多攤檔出晒名,雖然價錢係貴咗少少,但品質好有保證。3樓有熟食檔,我最多時候幫襯係裡面嘅泰國菜館,佢有個特式檔口由泰國人主理,好有泰國嘅味道,喺重建返之前,可能未必搵得返,或食得到呢個咁熟悉嘅味道。」

而陳庭欣亦經常去幫襯:「冬天特別去得密,因為識得手切嗰個牛肉檔,同賣菜地下嗰兩兄弟好熟,過時過節都會送禮物畀佢哋,或者我啲首映飛都會送畀佢哋。重建係咪好事?我諗總會有兩邊聲音嘅。有啲人可能覺得1988年到依家,已經好舊,有咁嘅需要;但有啲人可能覺得有好多嘅情懷。其實我反而會關心係重建之後係變咗乜嘢?會唔會又係一啲樓價好離地嘅住宅?我諗咁大個重建項目,應該有安排檔攤或街市遷移去另一個地方,冇理由咁冇安排,附近啲居民冇地方買餸囉,唔通個個都去荃灣咩!」

另外袁富華因為經理人、亞視前藝人黃美芬鍾意去九龍城街市食飯,而成日都會去:「街市上面有間樂園,好鍾意飲佢杯紅豆冰奶茶,炒米粉又好食,不過依家要排隊,清拆後可能會食唔返。」

頭條日報授權轉載

熱門文章

方媛分享女兒功課疑揭母女「約法三章」 郭富城堅持與妻女以廣東話交流
03-07
女子帶遇車禍、終生不能自理前夫改嫁 現任丈夫分擔照顧 餵飯、幫忙洗澡無怨無悔
03-07
病房陪愛兒3日直至去世 媽媽傷心辦喪禮 突然收到兒子訊息 結局超荒謬
03-06
唔怕改壞名︱2024 香港熱門中英文名字 榜首原來係呢個名...
03-08
天瑜腸道蠕動失調 暫時只能注射葡萄糖水 爸爸歷55次電療 癌指數已回復正常水平
03-08

8歲無針女童染甲型流感 周三發燒咳嗽 翌日入院病情轉壞不治
2024-04-20
袁偉豪張寶兒貼愛兒萌照賀「袁咕碌」5個月大 疑患濕疹導致突然忟憎
2024-04-20
美國小學女教師遭醫科生兒子砍70刀奪命 兒子:想殺很久了
2024-04-20
溫馨感人︳自閉症男生課室內突然爆喊 唐氏綜合症同學擁抱安慰 感動網民
2024-04-20
患癌孕婦放棄治療寧保女兒 網民讚賞母親勇敢 祝願奇蹟出現
2024-04-20
喬寶寶七成收入老婆管 晒舊婚照賀結婚周年 19歲高大俊俏似黃凱芹 喬妻美貌如荷里活女星
2024-04-20
查看更多   ▸