【呀劍萬帥】將軍澳 坑口體育館 兒童遊戲室 Hang Hau Sports Centre

2016-05-30


今日同兩個小朋友嚟到坑口體育館嘅兒童遊戲室玩吓

香港康文署喺每區甚至長洲都有兒童遊戲室,但係好玩又企理嘅唔算好多!

我哋搭地鐵嚟到坑口站B出口,沿住培成路行到尾就會見到西貢將軍澳政府綜合大樓(其實即係坑口體育館)行入公園轉左行上樓梯就會見到兒童遊戲室

一入到去已經坐滿人,呢度設置咗一個等侯區,保安姨姨喺每一個時段開始前10分鐘就會拎住籌派俾等侯緊嘅人,若果派哂之後,其他冇籌嘅人就要等所有持籌的家長小朋友進入遊戲室後繼續坐喺度等,只要有人中途離開就可以後補進入!

喺門外面都設有一個BB車泊車區,都安排得幾細心!

 

我哋啱啱好係最尾兩個,但係我哋一家四口仲差2張籌先得,但係其實保安姨姨唔係咁嚴格嘅!見我哋唔夠籌就話「算啦算啦,俾埋你哋入去啦」總算唔駛等多成個鐘先有得玩

 

門口上嚟已經有個氹氹轉斜路行上去除鞋的位置

一係到去哥哥就好快除咗對鞋一支箭跑咗入去玩,裡面嘅小朋友有大有細,大嘅跑嚟跑去對較細嘅小BB都幾危險,家長要好好咁注意佢哋安全

另外入到去穿過八爪魚好快就會發現有一個奇怪嘅位置有嘢圍住咗

我不其然走埋去望吓究竟係乜東東,原來係兒童洗手間的洗手盆地方,實在好得意嘅設計,可以在場內看見洗手間的位置

當然大家都係要離開遊戲室先從另外一個入口進入洗手間,而且小便的地方係唔會在場內看到過去

呢個場有個小玩意,總共有三個,好似一條蛇蛇咁嘅形狀,起初我已為係傳聲筒,喺下面講嘢,上面會聽見!但係原來係一個傳臉筒,咩叫傳臉筒?

原來佢裡面安裝咗兩塊鏡片,將下面小朋友的頭影像投射到鏡片再折射到上層鏡子,所以另一邊嘅小朋友可以睇住在下面小朋友的樣子

真係好攪笑, 個身喺下面, 但係由個鏡望入去見到個頭喺上面…..

場裡面都幾乾淨,因為每一節完之後都有姐姐清潔,不過有少少位置都較污糟,大家都要留意(例如地面上有好多一個個小圓塊,係可以拎出嚟,裡面都污糟㗎!)

仲有整個場地嘅地面有好多小梯級,一不留神都容易會跌親!

近窗邊有一個好大既圓形休憩位置, 貌似俾家長坐喺度睇住自己小朋友玩, 但係其實所有小朋友都會走入去玩

但係呢個場都幾啱玩伏匿匿,因為有幾多暗位!大家估吓我呢個匿埋嘅位係喺邊度…

就係呢度啦,佢哋兩個傻豬匿埋但係凸哂對腳出嚟,一眼就睇到!之後好多小朋友見我哋咁開心仲加入埋同我哋一齊玩

而且呢度都有好多小裝置, 細心行埋去玩吓又幾得意喎! 睇吓哥哥同妹妹個樣扭曲哂幾攪笑, 佢哋自己都笑咗出嚟

呢邊有個閱讀樂書架, 問過職員姨姨話因為俾D小朋友破壞哂D書, 所以自此之後就冇書再供應俾大家睇lu

俾媽咪發現原來有幾個軟墊係可以砌埋一齊

行番出去先去去小童洗手間洗洗手去方便吓先!

好快就過咗45分鐘,我哋離開咗遊戲室,都往上層參觀一吓,上一層1/F係體育館,喺館內都可以看見再往上層2/F係一條室內緩步跑道,真係打風落雨都冇藉口話唔跑

緩跑徑門口可以睇到開放時間, 入場跑之前要在門口登記(不過唔登記都得, 都係自律Mode!)

佢哋兩個見有咁多哥哥姐姐喺度跑,自己都興起跑咗兩個圈!

體育館內環境都好靚, 有好多充滿色的設計, 尤其係呢一副壁畫, 媽咪話見到介紹係展出坑口以前原貌的畫

最後我哋就離開體育館,喺外面公園再玩咗一陣就番屋企lu…

 

Photo by CANON 5D Mark III, Len | EF 24-70mm f/2.8L IS II USM

呀劍評分: 8分

 

呀劍評語: 咁多


坑口體育館 兒童遊戲室 簡介

位於將軍澳培成路38號西貢將軍澳政府綜合大樓1樓(坑口體育館)的兒童遊戲室,提供一個高質素而免費的室內遊樂地點。坑口體育館兒童遊戲室以奇妙水世界為主題,室內地上和牆壁均舖著軟墊,可讓兒童遊玩,尤其適合年紀較少的嬰孩在一個安全的環境中活動。遊戲室面積達226平方米,設有不同的遊樂設施,如海洋生物造型的軟墊積木、布藝兒童故事書、潛望鏡和靜態閱讀區等,全時間提供空調,每一小時十五分為一節,中間設有清潔時間。

地址

將軍澳培成路38號西貢將軍澳政府綜合大樓1樓

面積(米2)

226

 

開放時間

9:00am-10:15am

10:30am-11:15am

11:30am-12:15am

12:30pm-1:30pm

2:30pm-3:15pm

3:30pm-4:15pm

4:30pm-5:15pm

5:30pm-6:15pm

6:30pm-8:00pm


費用

免費入場

電話

2623 5928


(以上資料更新至文章當日)

Facebook專頁: 呀劍萬帥 kimfamilytraveltips

Blog網誌 : kimfamilytravel.blogspot.hk

熱門文章

方媛分享女兒功課疑揭母女「約法三章」 郭富城堅持與妻女以廣東話交流
03-07
女子帶遇車禍、終生不能自理前夫改嫁 現任丈夫分擔照顧 餵飯、幫忙洗澡無怨無悔
03-07
病房陪愛兒3日直至去世 媽媽傷心辦喪禮 突然收到兒子訊息 結局超荒謬
03-06
唔怕改壞名︱2024 香港熱門中英文名字 榜首原來係呢個名...
03-08
天瑜腸道蠕動失調 暫時只能注射葡萄糖水 爸爸歷55次電療 癌指數已回復正常水平
03-08