【80後媽咪】幼稚園生活回顧

2016-05-30


再過多一個月, 今個學期就完滿結束啦….
唔經唔覺,哥哥0係呢間幼稚園已經渡過咗4個年頭…..
六月三十開始,佢再唔係幼稚園0既學生啦….
時間….真係過得好快,好快….

仲記得,4年前,開學0既第一日
我大概永遠都唔能夠忘記嗰一刻嘅心情….
將佢送上校車….睇住佢拍窗痛哭叫媽媽…..
媽媽們,你們大概都明白我講嘅嗰種心情吧….
又擔心佢上堂喪喊,又怕佢唔習慣
又驚佢見唔到媽媽會害怕…..
見佢喊住上車,自己又好掛心
嗰種心情,真係好難用筆墨形容出來啊….

真係估唔到咁就四年啦….
所有嘅事,仿佛就好像剛剛發生冇耐一樣
但原來,嚟緊0既九月
朗朗哥哥就快要讀小一了!

去相
4年幼稚園生活回顧 

嗰時,我好記得朗朗係好驚佢班主任架
PNK1,都話唔鍾意老師,又成日話唔想返學
讓我都苦惱過好一陣子
後嚟至知,原來有一次,佢同幾個同學喺洗手間跑,俾老師教訓了一頓
之後,就一直耿耿於懷,唔鍾意老師啦!
不過,K2懂事之後,佢就好鍾意返學
又好敬重班主任了…..

20160530_414

仲好記得嗰時,我地住喺愉景灣
每日一早,就坐船出去返學
攰到呢….真係唔知講乜好…..
諗番轉頭,都覺得幼稚園其實真係近屋企嘅好….

 20160530_415

四年裡面,當中最最最難忘的,莫過於呢件事…..
一個超論盡嘅爸爸,竟然因為朝早太趕,一手抱住一個冇著鞋嘅哥哥出門口
直到上咗船,爸爸先醒覺,哥哥搞到赤腳返學….
仲記得,通知老師,叫老師俾室內鞋佢著返屋企嗰下
連老師都O晒嘴,同我講:教咗咁多年書,都未見過有小朋友冇著鞋返學架…..
真係超爆笑…..

20160530_416

幼稚園生涯
最最最讓我覺得辛苦,莫過於做功課
嗰時初初寫字,可能佢哋小手肌又未控制得好好啦
好多時,寫字都遇到挫敗感吧
有一段好長嘅時間,大家都為著寫字,做功課而角力
哥哥成日都會做到喊
寫得唔好,要擦佢啲功課,就扭到瞓晒落地
為咗功課,我地嘈過無數次交…..
幸好就係,隨住佢年紀愈大佢亦控制得愈好
雖然,現在偶爾仲係會為咗做功課而喊幾聲,但已經進步咗好多啦!!!!

 20160530_417

幼稚園生涯另一個好緊張嘅位
就係呢個…..見家長…..
以前自己讀書見家長…..都冇依家見家長咁緊張啊!!!!
見之前又要諗定一陣有乜嘢想問老師
又好驚老師話阿仔做壞事
又擔心佢返學唔知有乜衰野…..
真係慘過自己攞成績表…..

20160530_418

時佢學校K1、 K2係讀上午班架
時間好好,放學仲係可以呢度去,嗰度去
成日都可以去玩
現在K3,轉咗下午班….真係乜都唔同晒啦….
放學又要趕功課、趕沖涼同趕食飯
每日都好冇生活….

嚟緊九月,升咗小一
情況大概會更差吧…..
所以,都係勸大家,唔使喺幼稚園催谷得太犀利架
可以玩時,就讓小朋友盡情享受下啦…..
小朋友玩是理所當然的!!!!

20160530_419

對哥哥嚟講最遺憾嘅
大概係唔能夠同細佬讀同一間幼稚園吧…..
細佬,龍B,真係勁難考幼稚園啊…..
不過,唔緊要啦,其實我覺得分開讀仲好
細佬佢,太依賴哥哥了
大家讀唔同嘅學校,對佢嚟講,唔係一件壞事!

20160530_420

三年間,哥哥克服咗一個又一個嘅難關
由唔鍾意返學,由好驚做功課
到現在…… 畢業了…..
真的,成長咗好多啊…..

最近,成日聽佢講學校嘅事
佢同我講:我排隊唔會爭排第一架喇…..
我:咁乖,唔同人爭!叻豬!
朗:我依家鍾意排最後!
我:點解嘅?
朗:我而家同A、 B、 C、 D、E 同學一定齊齊排最尾架
朗:然後去音樂室嗰段路,我地玩跑步,玩槍戰
朗:咁老師就睇我哋唔到嘛!
我:哦!!!!!
朗:如果嗰日有兩個老師,一個跟頭,一個跟尾呢
朗:我哋成班 friends 就排中間

你話呀….佢幾似一個小學雞….
真心覺得,佢長大啦!
再唔係以前嗰個bb…..

 20160530_421 

嚟緊,過多一個月就要告別幼稚園
十萬個不捨得啊….
真的估唔到,咁快就六年啦….
再過多六年,又話小學畢業…..
然後,朗朗大概就會好似佢表姐依家咁,成為 teenager 
成日都會同朋友出去玩,唔再黐家,唔再黐媽咪啦…. 

諗到呢度…. 悲從中來……
到時,我知我一定會掛住依家嘅朗朗啫…..

作者:80後媽咪遇上10後Baby

相關文章:【80後媽咪】溝通比一切重要 
     【80後媽咪】長洲一日遊

熱門文章

【感人故事】夫婦領養初生男嬰6星期 生母突然後悔 即晚取回兒子 領養一家極度傷心如失至親
08-01
【美國研究】5歲以下幼兒新冠病毒量或比成人高100倍 專家憂開學或造成大規模感染
08-03
【感人故事】港媽誕6個月大早產嬰兒 堅持每日按時泵奶 雪櫃存滿一袋袋母乳等兒子出院
08-03
福建3歲女童玩「彈力乒乓球」 軟軸直插左眼恐損視力
08-03
網民換購玩具車不滿現裂紋 怒斥超市僅退款反被批
08-02

運輸署去信九巴 指無授權九巴總站放椅子給市民午膳
2020-08-03
181宗本地確診個案待入院 觀塘最多佔22宗 其次為黃大仙(附患者地點)
2020-08-03
【新冠肺炎】菲律賓封城 中介指數以百計菲傭來港料受阻
2020-08-03
史上最年輕 英國3歲男童登上破萬英尺高山
2020-08-03
本港增80宗確診個案 張竹君強調不能鬆懈籲「忍耐多一陣」
2020-08-03
【生命鬥士】美國2名男孩為天生腦殘缺患者 被判斷活不過7歲 二人今18歲雙雙高中畢業
2020-08-03
查看更多   ▸