張頴康麥雅緻結婚10周年 甜晒愛的宣言冧爆老婆

張頴康與麥雅緻向來恩愛，二人育有一女兩子，並不時在社交網大曬一家五口的溫馨合照。昨日（9日）是張頴康與麥雅緻的結婚10周年。張頴康在社交網曬出二人的甜蜜合照，並發表愛的宣言，獲網民激讚是絕世好老公。

 ^兩公婆難得撇底三個小朋友，二人世界慶祝。

^一家五口。

^好sweet！

 難得撇底三個小朋友與老婆過二人世界慶祝，張頴康在社交網分享了多張二人到餐廳慶祝的照片，相中二人頭貼頭，互相咀嘴，高調放閃，飯後更去了夾公仔，兩公婆玩得相當盡興，張頴康寫道：「『錫婚』結婚十週年喇！亦即係代表我做咗人老公十年喇！回想返呢十年，我哋經歷咗好多嘢！由兩公婆變成3位小朋友嘅父母；經歷事業上嘅高高低低，都係由我老婆陪住我，支持我，先至有結婚十週年呢一日！呢一日，我哋放低啲小朋友，兩公婆出去拍拖！先去行吓街，玩吓遊戲機，再夾公仔！好有當時未做父母之前嘅感覺！」

他續說與老婆到指定的五星級酒店吃晚飯慶祝，原來背後有「洋蔥」：「其實當年我老婆好想佢人生嘅婚禮喺呢間酒店舉行，但係我當年實在環境唔好，根本負擔唔起喺呢度擺酒！而我老婆冇介意過，要陪我喺一個負擔得起嘅地方舉行婚禮，仲將我哋嘅婚禮搞得好溫馨，好感動，好有意思添！所以，一個咁好嘅女仔，我點可以放過？」

最後他感謝麥雅緻這10年來的付出：「老婆，呢10年你走唔出我嘅魔掌，以後嘅日子，你都唔好妄想有機會喇！辛苦晒你照顧3個小朋友之餘，仲要成日照顧我嘅情緒！我愛你！餘生……請繼續指教！」

頭條日報授權轉載