名人專訪丨陳柏宇呻符曉薇喺屋企都話冇帶信用咭爆笑講家事指老婆係世紀騙案

2022-12-22

陳柏宇（Jason）將於明年2月feat.「九龍搖擺俱樂部」舉行演唱會，所以今年聖誕同新年都未能盡興咁玩，不過懷孕5個多月太太符曉薇（Leanne）就踢爆，其實老公完全沒節日感，唔鍾意驚喜亦零浪漫。Jason反而投訴老婆婚前婚後兩個樣是世紀騙案，更追問老婆點解喺屋企都話冇帶信用咭，兩人爆笑講家事。另外，Leanne 更公開懷第二胎情況。

Jason 聽到Leanne話今胎B女有長腿，即大騷自己的黃金比例，笑死！

繼上次賀年訪問，兩人又再將家事擺上枱，但feel到係有愛嘅！

Jason 今次演唱會有別於以往的演唱會模式，首次連同超過40人大樂團及樂隊共同演出，「今次個騷音樂性質係會強啲，想以唔同方法去做騷，我係好享受同人哋一齊合作嘅感覺，今次所有歌曲偏向管弦樂嘅方向去出發，但唔係請隊管弦隊嚟嘅感覺，因為想pop多啲，採用音樂嘅原素，搵唔同類型風格嘅樂手返嚟演奏，可以有啲唔同火花出現。」

Jason將於明年2月4日，feat.「九龍搖擺俱樂部」舉行演唱會。

由於演唱會在2月4日舉行，Jason預了普天同慶的聖誕等節日都要養聲，「心態上冇得玩，新年玩得太盡慶聲又唔好，我都諗緊做之前，睇吓媽媽（跟囡囡稱呼太太）同Abigail點樣可以配合到我，有機會都想佢哋去staycation，去返幾日等我可以有多啲時間喺屋企休養同埋集中多啲，Abigail喺度我又唔忍心佢嗌我唔應佢。」原來之前Jason開騷，已經測試過囡囡會有這情況，「如果我唔講嘢，佢會叫我『講嘢啦爸爸你講嘢啦』，我做口型，跟住佢扮我做口型，佢配合唔到，佢未明呀！」

Jason和Leanne早前同囡囡Abigail，齊齊公開懷第二胎好消息，預產期為明年3月。

Leanne曾有兩次流產經驗，一度令她沒信心能再懷孕。

送禮物唔鍾意有驚喜

不過 Leanne早已習慣一個冇節日感的老公，因拍拖時Jason連聖誕禮物已講明唔鍾意有驚喜，「我第一年送完嘢畀佢，佢同我講『其實我哋唔使做呢啲嘢，如果我要乜嘢或者你想要乜嘢直接講，唔使買到啲唔鍾意嘅嘢』，佢係好唔鍾意有surprise，好唔浪漫。」講到買禮物，Jason突然呻，「好搵笨，我家唔講聖誕節我要啲咩禮物嘅原因，係無論我講咩，啲錢都係喺個pool攞出嚟。」Leanne狂笑，Jason繼續爆料，「媽媽好好笑，佢有一個堅持係點都會碌我畀佢嗰張咭，但係我諗其實你碌邊張咭，你啲錢都係喺同一個source度嚟。」Leanne解釋分別是她的錢還是Jason的錢，但Jason忍唔住再話，「但好笑嗰次你話『嗰度唔收AE，爸爸你畀你張VISA我』，你冇VISA咩，冇帶？屋企嚟㗎喎，屋企都可以冇帶？！哈哈！」

結婚5年，Jason的直率性格，Leanne早已照單全收。

Leanne見Jason爆家事爆得咁開心，索性玩埋自爆，「我開頭拍拖唔係咁，一結完婚佢話係騙案嚟，嗰時好多嘢都係我畀錢，譬如去旅行嗰啲我多數會畀錢，我嗰時有做嘢，我嗰時好鍾意返工嘛，哈哈！」Jason笑指Leanne婚前婚後兩個樣，「佢話好鍾意返工，結咗婚生咗小朋友都希望可以繼續返工，但係佢結婚後有日同我講『我唔想返工』，真係世紀騙案，呢個唔係要求嚟，係知會同通知。」

Jason笑指Leanne婚前婚後兩個樣是世紀騙案。

搵堪輿學家幫BB改名

雖然送禮物方面，Jason對囡囡Abigail總算例外，但他跟Leanne承認現在小朋友經常有禮物收，「以前啲小朋友去人哋生日party，係生日嗰個收禮物，家嗰啲生日party，係個個小朋友都要有禮物。」所以生細女時，兩人都不打算跟潮流代細妹送禮物給姐姐，令姐姐不會呷醋。Jason解釋：「成日睇啱嘢就買畀佢，佢長期收緊禮物，同埋你送份禮物畀佢，佢唔會記住呢份禮物，以後都唔呷醋㗎嘛！」

2018年9月，Jason和Leanne迎接首個囡囡Abigail。

雖然有請工人，但Leanne愛親自湊女。

Leanne今胎同樣佗B女，但比上胎辛苦，開頭嘔足3個月，加上上次經驗肥人唔肥胎，所以冇再喪食，體重亦未有增加太多，「今次重咗廿幾磅，可能未懷孕前好瘦，減肥唔夠100磅，反而今次個BB係大隻過Abigail，醫生話隻腳長，我就即係諗『咁咪唔係佢（Jason）嘅』，佢即刻話佢對腳長。」Jason解釋自己身材優點，「係黃金比例。」之後Jason再發表偉論，「我唔明keep超聲波嘅相嘅必要囉！其實你上網個個超聲波嘅相都係一樣。」至於為BB改名，兩人亦已計劃好搵堪輿學家幫手，Leanne說：「始終我哋中文字窮，又要拼埋好聽。」Jason就補充，「何樂而不為，你又可以配合埋個時辰八字，寧可信其有，又唔會有壞嘅。」