唐寧與「方展博童年」黃寶龍激罕合體 為獻出人生第一次自爆驚到匿埋喊

^黃寶龍（右）很早便出道拍戲。

在TVB經典劇集《大時代》中飾演方展博的童年版的童星黃寶龍，當年拍過不少TVB經典劇集，如《射雕英雄傳》、《西遊記》等，與黃寶龍合作得最多的童星，原來是唐寧，其實他們從《笑星撞地球》已經開始合作，其後在《大時代》中飾演兄妹，接着在其他電影或者電視上，先後飾演朋友、兄妹、情侶，甚至為對方獻上螢幕初吻！不過黃寶龍在16歲的時候選擇退隱娛樂圈，繼承祖業打理書店，成為第三代掌舵人。移居紐西蘭唐寧日前與黃寶龍激罕合體，兩人在唐寧的YouTube Channel開直播，這次難得的合體已經勾起了不少回憶，有網民留言讚兩人保養得宜，外貌由細到大都沒有太大轉變，屬凍齡一族。

^在《大時代》飾演兄妹。

唐寧跟黃寶龍邊食邊傾，唐寧稱第一部電影是《笑聲救地球》：「我嗰部份係冇出到街，好似係做觀音，點知係冇出到街。」黃寶龍即說原來自己都有份演出，而且更晒了一張劇照：「嗰陣我係做唐三藏，全程要孭隻馬，嗰陣化妝時間要4、5 個鐘，真係好誇張，呢套係我哋第一套合作嘅 戲，估唔到我哋嘅第一次都畀咗大家！」唐寧又稱兩人差不多同年入行，年紀亦相距不大，在演藝生涯亦有不少共同經歷。重提當年《大時代》的演出，唐寧說：「嗰陣我哋成班小演員成日去試鏡，就算唔使拍嘢，我哋啲家人都會成日約去食飯。我成日對住呢個人，我懷疑呢個人有少少過度活躍症，佢好似唔使瞓，任何時間唔係跑緊就係講緊嘢，任何時間好似充爆電嘅超人咁！」唐寧承認跟黃寶龍是當年「最強CP」，大家的外型相當合襯，黃寶龍笑言：「而家仲可以演兄妹，遲啲你返嚟再合作就變父女呀！」

當年在《四個32A和一個香蕉少年》中，他們兩小無猜的角色有不少溫馨情節，重提戲中的一場接吻戲，黃寶龍坦言印象極深：「呢個接吻係我人生嘅初吻！我想問係咪你嘅初吻？」唐寧面紅紅地說：「呢個點止係螢幕初吻，真係我嘅初吻，只係被人錫過面珠墩，咀嘴就真係第一次！事前我係勁驚，我係驚到喊，去到準備拍嗰一刻，嗰個副導演姐姐陪我行公園安撫我，好彩最後都順利拍攝。」黃寶龍笑稱將很多的第一次獻了給唐寧，其中一場戲拍了二日才完成：「呢幕到我出晒事，因為我真係太驚，要有少少身體接觸，仲要摸大髀，試過匿埋一邊喊晒，好尷尬，好唔想拍，第一日拍攝好唔順利，導演好唔開心就收工。第二日拍轉咗張之亮導演補番近鏡，最終係搵另一個工作人員替我隻手完成拍攝，所以大家睇近鏡鏡頭隻手係大啲，而家睇番好似好對唔住啲工作人員！」黃寶龍坦言未知是否因這次拍攝的阻滯，令往後的工作邀約大幅減少，再加上踏入青春期之後，心態上感到氣餒，就開始退出幕前：「有機會都想做番幕前，而家主力打理書局。」

 星島日報授權轉載