無家母親節 ｜囤積症母親流落街頭 喪親智障學員 各有散聚成就「第二個家」

^63歲霞姐因婚姻不幸及子女關係不和睦，患上囤積症，一度流落街頭收集紙皮、膠樽、膠箱維生。(莫家文攝)

無家母親節 ｜母親節是慶祝天下母親的大日子，若沒有一個完整的家，難言破鏡重圓。自幼至婚後欠缺生活物資的霞姐，引發病態強迫囤積症，不斷在街上收集雜物，單位僅剩一條狹窄通道行走，與丈夫離異，子女關係欠佳，曾多次淪落街頭；中度智障的鑑昌先後經歷父母及胞姐離世，來回宿舍及工場上班，因掛念家人曾拆返舊居，甚至稱呼朝夕相對的職員為「媽咪」。大節當前，他們各自獲得機構照料，精神心理有所寄托，裂痕雖在，此心安處是吾家。

^霞姐曾居住在大角咀橡樹街行人隧道梯間，每日靠賣紙皮及領免費飯過活。(莫家文攝)

「個囡連小學四年級畫畫慶祝送畀我都唔肯，30年來母親節都慣咗一個人過。」63歲霞姐獲教會聘為義工煮免費派飯膳食時，眼見材料不足，主動買料補貼，「教會津助食材有上限，我見煮水蛋要加豆腐，我就用多8、90蚊買龍脷魚同豬潤『加料』，睇見飯友食得開懷，我就覺得開心。」偏偏不計較愛無償分享的她，多年來收獲子女的愛卻很小。

霞姐憶述成長於物資貧乏的六、七十年代，婚後以為生活得以改善，詎料丈夫給予僅夠基本家庭開銷的家用後，其餘日用品由她自行想辦法，「唔夠錢就要諗點樣添置返嚟，屋企所有床具櫃架都係免費，全部喺街上執返嚟。」她遺傳家族抑鬱症的病史，加上擔憂朝不保夕，結果引發病態囤積症，只要一見街上有閒置衣櫃、報紙及其他生活用品，便全數帶返家中儲存。「最嚴重個陣300呎公屋單位，堆到只有一條通道進出先有安全感，全家人瞓喺一張碌架床，老公除咗返工，返嚟就係念佛打坐，坐完就話我要出去啦，結果仔女唔開心成日喊，搞到家嘈屋閉。」夫婦二人最終形同陌路，97年前離異，丈夫從此離家不返，由她照顧3名子女長大成人。

婚姻不幸加上患心理病，霞姐與子女關係若即若離，三子女更鬧成水火，各散東西，其中同住二女亦有遺傳家族病史，小故與她爭執「我早上喺微波爐叮嘢食，佢出嚟鬧嘈住佢瞓覺，走過嚟打我，有一次我拎掃把棍保護自己，話你唔打我先放低，我對生活要求唔高，後來喺街頭鋪紙皮瞓手推車，覺得仲開心過喺屋企。」4年前她便以街頭為家，到處囤積執拾紙皮、膠樽、膠袋，病情一直未有改善。

霞姐2020底輾轉到大角咀橡樹街行人隧道露宿後，首次接觸同路舍，獲社工安排租住賓館及劏房棲身，但她又因囤積雜物被業主趕走，甚至送往葵涌醫院精神科病房接受強制治療，多年露宿生涯至社工安排暫住老人院舍，以及重新申請分戶上樓，人生才有轉機，現時她入住元州邨一個單位大約個多月，經常抽時間在教會及同路舍當義工，一有空閒便參加同路舍「大角咀100」運動和輔導中心的興趣班，既可與一般家庭參與者構建正常人際關係，亦可分散注意力，重新過上健康、積極的生活。「我一路以為冇期望就冇失望，去年七月喺（同路舍）橡樹舍社區中心做義工，竟然有人同我慶祝生日，廿幾年都未試過，當下感動到毛管戙，今年母親節去教會周末聚餐，我有信心唔再發病。」上月受洗的她心口戴着十字架，她重回橡樹街時望向街頭雜物，再無強迫囤物的心癮。