東張西望丨老父離世現三份遺囑爆爭產 大哥疑私吞千萬現金：長兄為父！

TVB節目《東張西望》早前（20日）報道一宗爭產案，98歲的黃爸爸於去年12月病逝，留下一幢自住丁屋、一幢出租丁屋，以及約一千多萬的現金，不過在黃爸爸離世後出現三份不同遺囑，成為爭產導火線。黃爸爸共有四女兩子，長女已經離世，還有大哥、排行最細的細佬，中間有三姊妹，接受採訪的則是細佬太太「黃太」，她代表四姊弟直接大哥罔顧弟妹利益，意圖侵佔亡父所有遺產。

黃爸爸第一份遺囑於2005年所立，所有遺產由大哥繼承；而第二份則是由黃太委託律師查冊出現，遺囑於2008年簽訂，遺產承辦人為大哥及細佬。第三份最新的遺囑，則於2018年簽訂，據說是黃爸爸為外孫買樓而特別訂立，不過因律師指當中出現多項錯誤，所以已經無效。

疑有人收起均分遺囑正本

黃太說：「我哋叫黃律師查冊，查吓香港有冇其他律師樓有阿爸嘅遺囑，只係出現黃律師手上的遺囑（即2008年簽訂的第二份遺囑），但係呢份遺囑冇正本。反而大哥拎住一份早過呢份嘅遺囑，問黃律師可唔可以承認呢份遺囑。」黃太質疑有人收起第二份遺囑正本：「啲房有人鎖咗，包括阿爸嘅房，根本入唔到。我哋都有懷疑過第二份遺囑正本會唔會係佢收埋，因為只有第一份嘅話，所有嘢都變咗係佢。」

黃太表示：「以前嗰份（遺囑）得阿哥個名，或者做成錯覺以為所有嘢都係佢。」黃太透露因為遺囑問題，現在所做的是「無遺囑承辦」，將遺囑平均分配給五兄弟姊妹：「有晒簽名，大哥都簽咗，我哋嗰陣聽到都覺得好同意。」不過月初律師卻表示因大哥要求，而要終止承辦，黃太引述律師意見：「如果遺囑冇正本就用以前嗰份，或者將三份拎去法院等批。」