山頂廣場BB瞓地無人理 外傭玩成個鐘手機 途人勁嬲力數六宗罪
2023-07-29
不平則鳴。有途人在山頂廣場見到一名外傭懷疑不恰當對待少主人，氣憤之餘不忘拍下「罪證」力數六宗罪，並將短片和相片上載至「香港僱主討論區(外傭/鐘點/陪月/本地ee) 」引起網民關注。
樓主於本月24日下午4時32分上載短片，指明時間和地點：「山頂廣場時間4:15pm」。帖文共有兩段分別長27秒和16秒的短片，片中見到BB一時自己坐於玻璃門門口地下，一時如游泳般瞓在人來人往的通道上，而外傭則在旁玩手機。
樓主指「坐喺餐廳食嘢真係睇唔過眼，希望個BB個爸爸媽咪見到」，連隨數出外傭在事件中的六宗罪：
1. 由BB自己坐喺玻璃門門口地下，一有人開門即刻會夾到
2. BB坐喺地下之後食自己對鞋，先後4次佢冇阻止，只係喺袋拎粒餅出嚟畀BB（我以為佢拎清潔紙巾）
3. BB係食完鞋冇洗手之下食餅
4. 粒餅跌咗落地下佢喺地下執返畀BB繼續食
5. 全程個姐姐只係玩電話完全冇理BB
6. 之後返去望個BB瞓咗係地下佢冇理，之後單手拖佢起身，再瞓地又冇理
但樓主不好意思地稱，「只怪我可以做到呢度，我唔敢行埋去鬧佢，如果你哋識BB嘅父母請話俾佢聽情況」。
樓主續指「其實佢知我一直影佢，所以佢之後拖咗BB出另外一邊，我返去睇咗幾次，情況都維持咗一個鐘。其實只係個人認為咁樣對BB唔係咁好，因為BB食鞋底多次同埋坐正玻璃門口，同埋佢只玩電話冇望BB，BB可能隨時會比人抱走，但係唔知佢父母會唔會認為可以接受，所以我都係反映個情況」。
獲頭條日報授權轉載
