【80後媽咪】朗朗成功了!叩門經驗的分享
2016-07-04
多謝大家嘅支持和鼓勵….
感恩….喺剛剛嘅星期六,朗朗已經被取錄了!
雖然,以後要跨區上學…..往後會有些少辛苦….
但我確實已經好感恩了!!!!
朗朗派位未如理想,然後叩門亦搞到一波三折
其實我們家有好多地方都真的做得唔係咁好
都好想分享番今次失敗嘅經過
希望之後要大抽奬嘅朋友,唔好重蹈我哋覆轍
話說,喺填表時
鴻仔有以下嘅說法
第一志願, 就填心目中的劉華!
第二志願, 就填二線,多學位嘅學校!
第三志願,本身我哋嗰區間間學校嘅學位都唔多
其實唔中第一、 二志願,基本上就中硬寶校的了
所以第三志願,鴻仔就話…..你填間好小小嘅寶校啦!!!
第四、 五、六填唔填,結果都一樣架咋…..
就係咁, 我地乙三填了寶校
乙四、 五同打後,都冇填過任何學校了
最後,我地成功中了乙三!!!!
朗朗亦成功入了寶校!!!!
呢個填法, 當時, 我都唔覺有乜嘢問題…..
因為,事實上
我哋嗰區來計,中唔到乙一, 就一定是中寶校的了!!!
但是…..
叩門就知衰!!!!
當日,一知道中寶
我哋兩公婆, 就拿拿聲去區內所有學校交叩門申請
仲記得嗰日係星期六來的!
我哋一日之內,叩了四間學校
到了星期一, 再叩了三間
然後星期二就覺得奇怪了!!!
叩了七間….. 卻一直沒有回音….
竟然沒有一間學校約我們面試
最唔開心就係, 明明有朋友同我講, 星期六去了A校交表,
當時 A校已經即時俾咗面試時間我朋友
但我到A校叩門時,學校竟然不肯接見朗朗
後來才知道,這就是111的重要性
那間學校, 原來只見111的學生呢…..
又因為,我們填表時只填了四間學校
於是,好多學校就會覺得
你由始至終都沒有填過我,你大概從來也沒有考慮過我們學校吧!
或者因為這個源故,好多學校都沒有接見我們
最後我哋在自己區內, 雖然叩了8間
但其中有兩間, 又撞了面試時間
最終, 8間學校裡面, 能夠有機會 interview嘅, 就只有3間
我們去到最後一日交叩門表格時
發覺唔能夠再坐以待斃了
因為本區學校似乎機會不大
唯有向其他區嘅小學埋手
最後一日,我們又一口氣交了幾份叩門申請……
總之, 就係漁翁撒網式的叩門
結論就係…..
其實出名小小嘅小學
往往都300-500人爭8-10個學位
另外, 好多學校都唔係人人都會接見, 多數都揀人嚟 in
即使我們最後叩到的那間學校
也不是 in 晒所有交了表的人
我自己就覺得,其實份 portfolio 都緊要
建議家長們俾心機小小做份 portfolio !
講到 interview
我覺得間間學校要嘅嘢都唔一樣
我們 in咗8 間
其中好多間都要求小朋友寫中文名, 睇下佢哋手字
亦有好多間考講故事
所以萬一要叩門的話,最好搵啲四格故事
訓練下小朋友嘅說話技巧了!!!
另外有間學校要做卷,有間就玩老師話
有啲仲會見埋家長添
其實, 好多主要都係同小朋友傾下偈
了解下小朋友嘅日常生活
可能考下佢對答,又可能想知小朋友嘅家庭背景吧!!!!
我哋叩門個過程, 都幾辛苦下架
我們由六月四日派位,到二十五號才有第一個offer!
眼見朋友們一個又一個脫寶
自己就仲未有學校收,當中嘅辛酸,真係不為人知…..
當時真的好俾怕人問起, 朗朗叩到門未….
我知道, 好多朋友都好關心我哋….
但一問起,我個心又會好難過了……
去到20/6,朗朗同學嘅媽媽叫我:
你依家咁多學校都冇得 in,又未有offer
不如你打電話去呢間學校啦,問下都好,求下校長俾你 in 啦….
當時我心裡面覺得
已經過咗叩門階段, 點會仲有學校肯收form架…..
不過,我真的走投無路…..
嗰位媽媽都講得啱嘅…. 喺呢個時候,乜都要試下架啦….
唔通, 真的睇住小朋友讀寶校咩?
咁我最後都硬住頭皮, 打電話求下校長…..
點知,又出乎意料之外
呢間學校,真的被我誠意感動, 肯收我表, 後來仲俾我面試添!!!
我想講就係,作為家長
有時, 真的唔能夠咁易放棄
原來你有誠意的話,有啲學校嘅校長,真係會俾機會你!!!!
後來呢間學校都收咗朗朗!
所以話,呢個世界嘅嘢真係冇人知
爸爸媽媽嘅心態,真的要keep住正面!!!
要記住,放棄,你就輸啦!!!
仲有仲有
如果你派采嘅嗰間小學
你確定自己係唔會俾小朋友入去讀
咁請你真的要勤力一點
替佢叩多幾間學校
之前講過, 佢哋啲學校,真係唔係人人都見
我們家一共叩了15間
其實,當中肯見我們的,得一半咋
咁你 in 完,又唔係一定收你架嘛
所以, 叩10間8間,我覺得真的唔誇張
最後,如果你仲係叩唔到任何學校
建議真係寫求位信
其實依家嘅小朋友,我覺得質素都唔差得去邊
大家識嘅嘢, 都係咁上下
我諗,如果小朋友質數上落唔大
而其中一個媽媽又不斷寫信, 咁學校收佢嘅機會,相對一定大啲啦
我見身邊嘅朋友,寫完信都真係會有學校call番
而我們,亦都係寫完信兩日收call的
基本上,我覺得學校都好鍾意有誠意嘅家長
我聽幾位前輩講,好多朋友 keep 住寫信,最後九月開咗學就收call了!
其實我們家朗朗,只不過係個普通過唔普通嘅小朋友
佢冇學琴,又冇證書,興趣班亦欠奉
我有一下都責備過自己
點解當初唔俾佢學多啲嘢,讓佢十項全能….
點解當初堅持要俾佢一個愉快童年, 攪到佢冇晒競爭力…..
當時,真係好難過,有著講不出的沮喪
感恩, 喺我最難過嘅時候
學校就call我們了!!!!
後來才知道…….
原來一個沒有任何技能,又怕怕醜醜的朗朗,都會有人欣賞的
希望未叩到門的朋友,千萬不要放棄
要記住,每一個小朋友,都是值得欣賞的
要加油啊 !!!!!
相關文章:【80後媽咪】獲派「寶校」的媽咪