【名人留學】陳爽：把握留學的黃金時間

憑選美入行，現為一子之母的陳爽，自小的求學路都算chur，十八般武藝樣樣學齊、讀大學時憑好成績tran U（轉校），又參加學生競選活動……回望求學階段，陳爽最難忘的反而是初到加拿大、孑然一身的一年。

不要呵護備至  更愛新挑戰

陳爽在內地成長，笑指母親是虎媽，「要學武術、跳舞、鋼琴、畫畫、表演、游水、滑冰。」這樣的童年有得有失，「細個唔會同其他小朋友比較。媽咪安排，自己就會適應，當然會錯失好多童年時光。但都有著數架！選美時可以彈鋼琴、跳舞，呢啲都要多謝媽咪。」不過，陳爽表明不會對兒子Adrian施同樣方法，「我希望佢可以搵到自己感興趣嘅方面發展。」

完成高三後，陳爽到了加拿大升學，首先讀一年國際學校，「係全新嘅環境，咩都要適應，自己處理衣食住行，克服語言障礙，會忽然覺得自己懂事咗好多。」溫室小花終於有機會獨立起來，感受特別大，「今日食咩、買咩餸呀、要溫書溫到幾點、幾點瞓，呢啲全部自己話事！」而且遇到好多好同學，「冇人蝦我，啲人真係好好，大家都好友善。」種種挑戰加起上來，成就了陳爽求學階段最難忘的時光。

▲陳爽最希望兒子找到自己喜歡的事，現時他比較喜歡運動

兩校學習各有得著

透過維基百科，很容易得知陳爽讀過多倫多大學（UT），但wiki不會告訴你的是，陳爽入讀多倫多大學前也在York University讀過一年本科。她坦言轉校是因為大學排名，希望父母『開心啲』；不過排名榜亦有一些事情沒有告訴陳爽，「我喺York讀嘅校園特別小，是雙語（英、法語）campus，班比較細，其實我覺得師生之間嘅交流會密切啲。去到UT就真係『名勝』、『大學』，好有歷史。一上堂就係百幾人，反而失去咗份親密感。」

陳爽在多倫多大學修經濟，一直以為自己會從事金融行業，亦努力參與學生活動，希望填好履歷表，建立人脈。「喺香港可能唔同，喺內地好多學生領袖係由老師點名，但到咗加拿大係『民選』嘅，有好多拉票活動、公開演講嘅機會，對我嚟講好新鮮。喺過程中好多人撐自己，好多友誼，好感動。」

▲陳爽（左一）曾當選多倫多大學中國大學生聯合會副主席

▲陳爽指選美前連高跟鞋都不會穿，選美是因為『貪得意』。

把握留學的黃金時間

因緣際會來到今天，與當天志願已有好大出入，陳爽連性格都有所改變，不似大學與選美時代般愛衝鋒陷陣，「當時讀的大學比較好，會成日諗學啲乜嘢，或者考多張證書，但而家唔會喇，會慢啲，睇吓周圍嘅人，有咩要人關愛，多啲相處溝通。」

對於留學，陳爽不會具體指出好處，反而強調是一個整體的體驗，「黃金時間唔多，好似我而家學咩都好似…… 記性唔係幾好咁。但嗰段時間去留學，眼界會開咗，學嘅嘢都會多咗。」陳爽的丈夫在英國劍橋大學畢業，能否考入爸爸的母校仍看Adrian能力，不過陳爽夫婦已有送Adrian到英國留學的打算，同樣盼望他能在黃金時間有更多涉獵。

▲陳爽亦曾到過英國牛津大學交流，希望兒子將來有機會到英國留學

▲陳爽與多倫多大學

撰文：方子晴
攝影：褚樂琪
部分圖片由被訪者提供
鳴謝場地提供：Habitat

相關文章：【親子訪問】陳爽 — 細B冇有怕　慢啲咪慢啲
                   【我的留學生活】陳宇琛 體驗三國教育模式
                   【我的留學生活】雷頌德：幸好去了英國