聘請工人姐姐面試問乜好？ 網民列舉14條模擬問題教路 提醒一點最重要！
2023-11-15
不少人會聘請工人姐姐處理家務或做保姆，萬一遇到差的家傭，隨時比自己親手打掃或湊小朋友更煩惱。有網民招聘外傭「照顧1歲BB」前，特地在facebook群組「聘請工人姐姐關注組」內求教網民「in（interview，面試）海外工人姐姐，一般您們問她們咩問題？」
面試外傭問乜好？即睇網民熱心教路：
網民：錄影面試過程
回應的網民熱烈分享經驗和想法，有人認為既然樓主需要找外傭照顧嬰兒，便應單刀直入，提出相關的問題，如「可以問下佢，如果BB發燒，你會點做？如果BB跌親，你會點？另外，可以試下問佢，如果要同BB同房，你有無問題？」；另有人提醒「錄影整個interview嘅過程」。
有網民接著詳細指：
•「問佢初生BB會有咩問題出現，佢會點解決；佢曾經用佢自己嘅咩方法去留意到BB嘅需要；湊初生BB有無邊幾點係最重要嘅——衞生、大人要醒瞓、沖奶注意溫度，類似呢啲；或者再深入少少如果BB成晚喊唔瞓佢會點處理」，但網民提醒「佢哋嘅答案未必啱你心水，但佢答唔答到，識唔識答就知佢有無經驗，同有無心湊初生」。
•「使唔使拜神？香港有無親友？工作時不准玩電話（睇佢反應）食唔食煙？有乜工作經驗？如有，叫佢詳述每日工作流程畀你聽。叫佢詳細講解每樣工作嘅細節同步驟（如湊B開奶過程、換片、煮餸等）同佢講你屋企裝咗cam（攝錄機），問佢有無問題？（睇佢反應）有乜要求？記得錄影整個interview嘅過程」。
網民：出情境題 單刀直入
另有人從外傭實際工作角度去提問，如「甚麼工作佢覺得最困難？」、「有冇動物敏感」、「要接觸豬肉。要整豬肉」、「我會問佢你有咩要求」、「如果無海外工作經驗又有小朋友嘅話，問下佢邊個幫佢照顧小朋友」、「用情境題問嘢，一嚟試到溝通能力，二嚟可以睇下佢個答案正唔正常」。
有人也提醒同一個原則，「唔好問啲yes／no（是／非）問題 ，問處境題，睇佢溝唔溝通到，英文得唔得，有冇common sense（常識）」；另建議施下馬威，「同佢講，好辛苦㗎喎！開工唔准玩電話帶耳機！」。有精明的網民建議查問「上一份工點解唔續約，通常啲姐姐支吾以對，有啲嘢咁，無嘢嗰啲會答得好大方」。
網民：請外傭要講眼緣
除實際問題，有回應的網民則反映，外傭面試前或已背熟標準答案，而且面試時一個樣，上工時卻另一回事，因此認為請外傭要講是否合眼緣：
•「我乜都冇問過，in咗一分鐘都冇，見佢笑得好開心就講咗」
•「我都係，同埋其實佢起海外，隔住部電話，佢講咩大話都得啦，最緊要合眼緣，都別無他選」
•「其實僱傭中心教佢哋背晒啲答案，所以佢哋答案都係統一咩都識，咩都唔驚，嚟到全部另一回事」
•「見工時候乜都話yes乜都話得，嚟到乜都話唔識乜都話唔做！另外有啲履歷可能係假嘅，尤其是係之前嘅工作經驗，佢話曾經去過邊度邊度做個幾多年其實係佢講，你冇辦法證實係唔係。又或者有啲曾經嚟過香港而短暫畀人炒咗就唔向你披露。呢啲已經成為佢哋training（培訓）嘅基本功夫，佢哋唔識都會agent（中介）或同鄉教佢哋！」。
獲星島頭條授權轉載
更多文章：
