吳浩康拒借錢度日 每日做足15小時 「唔想用養育仔仔做名義去借錢」

現年40歲的吳浩康1999年參加《全球華人新秀賽》入行，去年11月初吳浩康與英皇娛樂結束20年的賓主關係，同月自揭到地盤工人，更變身「地盤KOL」，不時分享「職安真漢子」的生活。日前吳浩康接受Youtube頻道訪問時，大爆指有75%藝人收入不如地盤工，他更因2個理由寧願當地盤佬也拒去借錢。

吳浩康16歲參加《新秀》是他人生很重要的里程碑，2003簽約英皇，曾被冠以「「靚仔版」陳奕迅的稱號，吳浩康近日接受YouTube頻道「BBO | Black Box office」訪問，憶起當年的事業，他自嘲是自己攞嚟：「起步嘅時候超順暢，所以就會覺得好多嘢好容易，因為生活太順暢、太好玩，所以就年少輕狂。」2004年在警方一次掃毒行動中，吳浩康被捕和藏有危險藥物罪名成立，自此事業陷入低潮，他說：「我嘅低潮全部都係自己帶畀自己，自己搞出嚟。」

做地盤也不想問人借錢

吳浩康去年放下歌手身段，去做地盤搭棚工人，吳浩康說年紀越來越大，面皮越來越薄，不想去向人借錢，會用其他方法度過，他認真地說：「會介意將來個仔聽返啲說話，『老竇，你去借錢畀我買尿片呀』佢冇講過，佢冇咁做，我唔可以喺佢冇得揀嘅時候，用養育佢嚟做名義去借錢。未可以透過唱歌去搵錢，我咪做住其他嘢去搵錢囉。」之前做的是搭架的工程，譬如參與過大一點的工程，就是亞洲博覽的東大堂維修。

拍戲環境比地盤更辛苦

吳浩康表示現時星期一至四返地盤，每日要在清晨5時45分起床，才可以吃個魚柳包早餐：「咁先至可以有個短短嘅me time。」因為通常都是8點到地盤開工，黃昏5點收工回家沖涼，看太太有否東西要他去買，然後就馬上返studio教學生唱歌教到11點。主持人問到他現時的工作比歌手還要攰，吳浩康竟自嘲地說：「純粹做歌手都可以好攰，只係我冇嘢撈啫！」他又表示拍戲的環境比地盤惡劣，也比地盤辛苦，「拍戲係好辛苦，大家以為啲明星可以好好坐度食飯，你要好明嘅明星先可以，如果唔係，都係沙塵滾滾，都係好惡劣。」

求PM介紹筍工

吳浩康原來去年早開始去做地盤，但就在11月才拍片公開此事，他說在開工時「好多人影，拍到我都覺得煩。啲人會講你係公眾人物，拍吓你預咗㗎啦，係唔犯法、係預咗，但係唔代表舒服，如果我冇公開講過你哋就好似發現新大陸咁，我公開講咗，你哋唔使咁好奇。」

他坦承說做地盤目的只有一個「淨係為出糧嘅啫，冇為過大家對我有任何睇法，要扮嘢嘅話，我使乜霉咗咁多年至去做。如果你話搵到份工俾我扮做，但有糧出，真係不妨pm我。」對於有人說他返地盤都只是「hea」做，他說：「我同你交代嚟做咩呢，講真你又唔係出糧俾我嗰個，hea唔hea係同合作嘅人交代，如果呢一班人話我hea，我就真係會檢討。」

娛圈沒落腳地

由藝人轉去做地盤，不少人會負面地認為他在娛樂圈「撈唔掂啦，一早就應該去（做地盤）。」吳浩康說：「香港以我理解，佔咗有75%嘅藝人，收入不如一個地盤工人，我哋要欣賞嘅係香港藝人嘅堅韌精神，咁辛苦都繼續捱住。」他透露之前曾聽過一番關於他的說話，令他深深明白娛圈沒有一個可以收容他的地方，「去TVB大台又唔要佢，ViuTv又嫌佢老，內地？你睇佢公司都唔推佢返去，你就知佢冇路行啦，度度都唔要佢。」他覺得描述得很貼切，「度度都冇一個落腳地，所以我自己曾經都覺得，究竟我可以做啲咩呢？」

還在發歌星夢

不少人都曾經問吳浩康會否放棄歌星職業，最近有網友跟吳浩康說：「好欣賞你，你終於醒喇！唔發明星夢啦」，而他回應說：「我做呢份工就係為咗搵多啲錢嚟支持我嘅明星夢。我都同佢講，對唔住我係未醒嘅，我唔會醒，我只會用一啲實際嘅方法，實踐佢出嚟。」

吳浩康說最初他去找地盤工時，對方故意派好辛苦的工給他，到見到他去開工時，對方說：「估唔到你真係嚟喎，我買重你唔嚟。」做地盤之後建築商邀請吳浩康做annual dinner嘉賓，他說：「好開心，成件事係好溫暖嘅。」那公司有一個坐office的同事問他會否有粉絲的舉牌，如沒有，他們便要做來支持他，吳浩康當時即高興地說：「做得好，我跑幾個返嚟俾你。」

星島頭條授權轉載