約1歲細女Sucy誤吞紙皮 被Lucy「扣喉」喊到面紅紅
2024-01-28
48歲李璨琛與太太梁志瑩(Sophia)結婚11年,育有大女李元元(Lucy)和細女李斐斐(Sucy),一家四口幸福美滿。Lucy媽不時於社交平台分享親子日常,早前拍攝到Lucy「踢」到妹妹嘔奶後,日前再上載約1歲Sucy食紙皮短片,最終更釀成「悲劇」。
5歲Lucy早前為氹妹妹開心,越玩越肉緊不慎踢到對方面仔,搞到Sucy嘴角吐出幾滴奶,幸無大礙。相隔一個月,Lucy媽再於IG分享囡囡食飯相及照片,可見兩個寶貝女瞓到頭髮飛起晒,相當搞笑,她寫道:「本身見到佢哋兩條友仔個頭咁亂想影低笑吓,一個不小心竟然影到一個悲劇嘅發生。」
片中所見,Lucy忽然將手指硬塞進妹妹嘴巴,搞到Sucy放聲喊到面都紅晒,她即命令對方:「喂!擘大個口!呀!我攞唔到呀!」說時手指仔越塞越入如「扣喉」,令Sucy出現催吐情況,原來為食妹妹誤吞紙皮,最後還用四隻牙仔咬停對方,Lucy秒縮手苦喊:「好痛呀!」
不過,Lucy媽仍打趣留言:「家姐終於可以深喉,阿妹又食紙皮家姐努力想將紙皮拯救,結果阿妹得嗰四隻門牙竟然依然咬中家姐隻金手指,阿妹感覺好生人勿近。」
Lucy媽被網民怒轟:好彩無咬甩牙
雖然網民們都覺得兩個妹豬互動好搞鬼,但不少人亦質疑Lucy媽沒有睇實Sucy,令囡囡亂塞紙皮入口:「點解會(有)紙皮係一個疑問」、「唔好俾紙在佢視線範圍內喇」、「老母係咪唔畀飽奶susu食呀?餓到紙皮都食?」、「李伯母,咁大整蠱整塊紙皮畀阿妹,好彩無咬甩牙咋」、「阿強嘅反抗係咪因為家姐隻手指污糟咋?」。
小兒外科專科醫生:留意3大徵狀辨別誤吞異物
中大醫院小兒外科專科醫生繆蔚章醫生曾接受《Oh! 爸媽》訪問有關「小朋友誤異物」專題,當小朋友誤異物時,建議家長保持冷靜,觀察小朋友有甚麼病徵,若小朋友用手按着條頸,唞不到氣,講唔到嘢,臉色變藍,即表示異物哽在呼吸道,要立即幫他進行急救。若兩三歲小朋友, 家長可以跪在小朋友後面,用兩手環繞他的身體,一手握拳頭,一手按着拳頭,在小朋友上腹部向上chok,望能chok到小朋友吐出異物,同一時間都要找人幫手打999求救。若小朋友誤吞異物後仍能講到嘢,就無咁擔心,但也建議家長找出跟誤吞的異物相類似的物件,並帶去見醫生,有助醫生判斷應該做甚麼治療,但這段時間家長不要給小朋友飲水或食物,以免延誤治療。
詳情:誤吞異物│小朋友誤吞磁石珠要切腸 小兒外科專科醫生:留意3大徵狀辨別誤吞異物
星島頭條授權轉載
更多文章:
陳豪10歲大仔示範非凡拍攝技巧 影家庭照媽媽妹妹被「斬頭」 陳茵媺護仔: 藝術角度