【名人媽媽】郭羨妮：無懼「聖瑪利出修女」想囡囡入母校
2016-07-14
近年網絡熱傳一句話：DGS出才女，Maryknoll出靚女，St. Mary’s出修女。於St. Mary’s畢業的郭羨妮（Sonija）稱，這種講法於她讀書年代已經流行。不過她無懼女兒（Kylie）變「修女」，希望她能入讀母校，「因為我驚佢拍拖！」
聖瑪利 出修女？
嘉諾撒聖瑪利書院予人感覺保守，不過Sonija沒有後悔當「聖瑪利人」，更希望囡囡都能夠考上，皆因St. Mary’s夠純樸，學生好乖唔貪靚，「我哋當年都有一兩個同學好靚女，我哋直頭覺得好似鍾楚紅咁靚。點知我哋發現佢搽唇膏返學，我哋就『咦…』咁囉。覺得佢唔乖，唔再鍾意佢呀，哈哈！」
Sonija稱得上模範學生，做Prefect，用功學習，「有啲同學好活躍，鍾意sports，一放lunch就衝去操場或者tuck shop；但我就係讀書派，一放lunch就會快手食飯，然後喺Old Building、Main Building讀書。」她並不覺得催谷，亦不覺悶，反而十分喜歡這種讀書風氣，「我哋會覺得要讀好書、想學嘢，面對考試就當同大家比賽；父母都冇話特別俾壓力。」順理成章，Sonija帶著1A、1B、2C的高考佳績離開母校。「我哋個個都好proud of 自己係 St. Marian！」
▲這位港姐冠軍於讀書時代並非風頭躉，有點baby fat，中六才開始戴隱形眼鏡。
赴加升學 第一學期即滑鐵盧
Sonija中七時已知自己即將舉家移民，因此報考溫哥華的大學。沒料到甫到西門菲莎大學（SFU）即遇到挫折，「自己『名校』出嚟，以為英文唔會差得去邊，就選修一科英國文學。點知佢無端端俾個D定E我，哇，好唔開心。」講師召見，狠批英文錯晒，不是外國寫法，Sonija才驚覺外國與香港的學習標准大不同。
「我以前喺香港最驚數，唔怕講，我會考拎D，考三題先做得題半。但去到加拿大啲數竟然拎A+，先發覺香港讀書真係好谷。」Sonija唯一可以肯定是自己背誦最強，因此一早選好主修心理和商學，趕上當時讀商的大潮流。
唔講唔知，Sonija到SFU前曾入讀仍是專上學院的理工。「SFU收我讀Spring Sem，年頭先開學，所以都有接受JUPAS（大學聯招）offer。」其實Sonija的成績足以考入HKU 法律系，「我係聽我爸爸講，放Poly物理治療做第一位，而家梗係知係好嘢，但當時會唔識諗，見人哋4個B都入讀HKU LAW，好唔開心。」再揀，Sonija會選HKU還是SFU？「我仍然會去加拿大，喺外國讀書見識多啲，嗰度啲人真係會攤喺草地讀書，係另一種生活。18、19歲，有青春有活力，重新去適應一啲嘢係幾好。」
▲Sonija中七後赴加，坦言因為「太大個」難融入，多與香港人結伴，認為不太應該。
▲因為不想人生平平淡淡過去，Sonija於畢業後當空姐並參選香港小姐。