7旬伯「街市飲湯飲出真感情」 認識43歲內地婦1個月 極速再婚 細女疑擔心被騙將聯名戶口$450萬領走

雖然戀愛是自由選擇，但被稱為「忘年戀」、年齡差距較大的伴侶，社會人士往往給予不接納的目光。一名年屆7旬、9年前喪妻的伯伯，早前在街市認識年輕逾30年、經歷離婚的內地女士，伯伯與她相處1個多月後即 極速再婚 ，不過其5名子女認為新後母是想騙父親的積蓄，因而關係決裂，細女更將銀行聯名戶口的450萬元取走；日前2人聯絡電視台節目，對該5名子女作大控訴，而該名被指貪錢的內地女士，更大爆伯伯曾為此事而2度欲輕生。

7旬伯「街市飲湯飲出真感情」 認識43歲內地婦1個月 極速再婚 細女疑擔心被騙將聯名戶口$450萬領走

電視節目《東張西望》昨日（5日）播出一宗求助個案，一名76歲伯伯「何伯」聲稱被細女由銀行聯名戶口中取走450萬元積蓄。

節目組追查下，得知早前何伯在街市認識一名年輕逾30年、經歷離婚的內地女士，並且2人極速發生關係後即簽字結婚，然而何伯的5名子女卻認為新後母是想騙父親的積蓄，因而關係決裂，當中細女更疑將擔心化成行動，將銀行聯名戶口的450萬元取走。

忘年戀街市飲湯飲出真感情

引述節目內容，76歲何伯的太太於9年前因病離世，他本來與5名子女一直相處融洽，直至日前在街市認識一名年輕30年、經歷離婚兼有18歲兒子的內地婦人後，繼而2人極速結婚後，他與子女關係便出現決裂。

何伯指，當時自己在街市經營報紙檔，而新何太則在對面擺臨時攤位，「大家你眼望我眼，幾好；佢煲湯俾我飲，我就飲，佢啲湯又幾好飲，我就飲出感情，大家就簽紙」；而新何太亦指，2人經常互相買飯，「佢好感動，覺得我懂事」。

送2卡鑽戒逾10萬名錶作定情禮物

2人認識1個多月後，新何太主動向何伯提出結婚，她於訪問中表示「同佢行密咗，發生咗啲關係，就決定結婚」，而何伯則表示：「太太話我哋真係相愛，不如去簽結婚證書啦。我話好，不過遲啲俾我諗諗先，後來去簽紙。」

何伯更向新何太送贈價值逾13萬元、超過2卡的鑽戒，，以及價值10.3萬元的勞力士腕錶作「結婚禮物」，何伯更表示「我鍾意我老婆，佢要咩我都想俾佢」。

相信愛妻「老實人」欲給予100萬做生意

不過何伯結婚後，本來相處融洽的5名子女卻態度大變，直斥「點解識咗個女人，而家好多內地女人係呃錢」，對此何伯指：「我諗我信得佢過，唔會呃我錢，我心目中佢唔係壞女人……冇擔心過，我一睇到佢就係老實人。個個都針對佢，你話我幾心痛吖。」

事實上，子女的擔心不無道理，因為何伯與新何太相識1個月後，新何太已經叫對方由定期戶口提早取出100萬元做生意；何伯在訪問中解釋「我諗住佢……」，新何太即搭嘴表示「想做餐飲，覺得香港餐飲業有得做」。定期存款原定6月28日到期，節目問及為何不多等幾個月才提取，何伯未有解釋，只表示：「諗住搞啲生意仔，覺得老婆老實，唔會呃我啲錢。」

然而，何伯於2月19日到銀行想領錢時，卻發現戶口的款項已經不翼而飛；原本何伯的定期戶口與細女聯名，他指要雙方簽名才能提款，而當時銀行職員表示提早領錢要罰息11萬元。新何太指：「佢話要罰息我哋都考慮咗一陣，佢仲要叫個女嚟簽名，佢咁講就hold住先。嗰個銀行職員就話等到期就可以自己攞，佢（何伯）都叫職員開個個人戶口。」

450萬定期疑被細女領走

對於450萬元款項不翼而飛，事後職員表示已被女兒以本票形式匯走；何伯指，銀行職員表示其聯名戶口是「單簽」，即其中一方簽署便能領款，不過他卻表示未有同意，「我仲喺人世，佢攞咗筆錢走我唔知。佢（職員）話我同意單簽，我都冇同意……我一定要雙簽，如果係單簽嘅，我駛乜咁穩陣吖？」新何太亦搭嘴指：「雙簽係為咗防個女！」

何伯表示，當時即致電細女，不過他指當時女兒表示：「你同佢雙宿雙棲啦，而家你戶口得返4,200蚊。」

新何太爆喊指伯伯曾2度欲輕生

節目亦播出何伯、新何太與銀行職員的錄音，何伯再三問職員雙簽問題，而職員亦指是根據「白紙黑字」，內部亦已經查清楚：「因為你哋當初指示，其實係任何一位都有效。」新何太即指：「你哋錯晒喇！」銀行之後亦回覆指，今次處理並無違規，不過何伯堅持：「我對你總行回覆非常唔滿意，因為定期戶口係雙簽，但係利息存摺就單簽，我覺得好清楚㗎喇！」

新何太更大爆，何伯與子女關係缺裂後曾2度欲輕生，並爆喊表示「你死咗，將來個女搵我算賬……」。節目將於今日（6日）繼續播出個案，被指貪錢的新何太亦繼續大反擊。

來源：《東張西望》

更多文章：

張致恒老婆雯雯疑驗出腫瘤！心痛兒子發高燒再入急症 愛犬患癌症

變態父嫌6歲仔「太肥」迫上跑步機減肥狂跑 重傷死亡