東張西望何伯 ︱與43歲內地婦 閃婚 致子女反目 得知妻子承諾養家大讚「冇娶錯老婆」

因為「街市飲湯飲出真感情」的 76歲伯伯「何伯」，與43歲內地女士認識1個月後極速 閃婚 ，結果與5名子女關係決裂，細女更擔心新後母是想騙父親的積蓄，於是將銀行聯名戶口的450萬元取走。電視節目《東張西望》周日（5日）報道何伯個案後，昨晚（6日）繼續跟進事件，何伯及新何太繼續於鏡頭前展示深情一面，何伯更被新何太指曾尋死。

東張西望何伯 ︱與43歲內地婦 閃婚 致子女反目 得知妻子承諾養家大讚「冇娶錯老婆」

即睇跟進報道：

事件中的76歲何伯於9年前喪妻，日前在街市認識一名年輕30年、經歷離婚兼有18歲兒子的內地婦人，2人認識1個多月後極速結婚，同時新何太要求對方給予100萬元做生意；何伯的5名子女認為新後母是想騙父親的積蓄，當中細女更疑將擔心化成行動，將銀行聯名戶口的450萬元取走。

何伯與銀行就聯名戶口提取儲蓄時用「單簽」或「雙簽」的問題爭論不斷，另一方面他亦因多次找子女而未獲理會，而心情低落。在昨日播出的《東張西望》中，新何太心痛老公被子女離棄，2人多次爆喊，太太更指對方曾尋死。

染上新冠但子女不聞不問

何伯表示，近期曾多次致電子女都沒有人接聽，而他早前染上新冠肺炎，子女亦不聞不問，對於供書教學多年得到如此回報感心痛，但他仍感恩太太在身邊陪伴：「冇呢個老婆喺度我點算？邊個服侍我呀？」何伯亦心痛太太被他的子女辱罵，何太表示：「佢哋搏命鬧我，鬧到我都怕咗，都唔敢再聽佢哋電話啦！佢哋鬧我『姣X』、『臭X』、『大陸X』，仲有死八婆咁囉！我即刻Cut線就算，我一句都冇出聲。」何伯表示：「佢哋咁樣鬧法我都好傷心。（大女）又話同我斬纜，又話同我攬炒呀咁！老竇幾十歲……攬炒？你咁後生同我攬炒？我咪咁話佢囉！後尾佢又唔聽我電話。」何伯指，大女曾在凌晨12時至清晨5時無間斷打50次電話給他，未知是出於關心還是想滋擾，而他亦展示對方「侮辱」的訊息：「我親愛的父親，你死咗未？咁耐都唔覆電話。」

子女劃清界線二仔更換門鎖

何伯以往住在二仔的家，但因為他堅決 閃婚 ，5名子女都以行動與其劃清界線，除了不聽電話，二仔更將家中門鎖換掉，令何伯無法回家，現時要居於新何太家中。節目組跟隨何伯回二仔家中想取舊文件，但開不了門，何伯表示：「有我啲雜物、有褸、有衫，喺我間房度，鎖住晒，攞唔到。我早15日前仲同我而家個太太返過嚟，同我攞過些少嘢，咁而家換咗鎖囉，返唔到入去喇！」

細女拒見女婿粗口問候

至於調走聯名戶口450萬元的細女，事後沒有接聽何伯的電話，節目組與何伯到細女工作的醫院等待，但卻未能成功見面。何伯表示：「佢好冇人情味囉！3月份我哋去搵佢，喺佢門口啲椅坐喺度等，等到佢喺間房度出嚟，打個招呼話有啲偈同佢傾吓。咁啱我老婆喺度，我老婆笑笑口對佢好好禮貌，點知佢雙眼瞪實我老婆，即係好似想殺人咁。」最後細女更表示要報警，拒絕與爸爸溝通；細女老公接到外父電話，亦用粗口「回敬」長輩。

何伯與子女關係決裂前情提要：

更多文章：【7旬伯「街市飲湯飲出真感情」 認識43歲內地婦1個月 極速再婚 細女疑擔心被騙將聯名戶口$450萬領走】

新何太心痛老公遭遇

對於老公的遭遇，新何太大感心痛，受訪時更多次落淚，「好難受，又心痛我老公夾喺中間，佢啲仔女又咁樣對佢。佢唔應該受呢啲苦呀嘛，佢人咁好。佢哋唔錫我都錫吓佢呢個老竇啦！」新何太曾勸何伯回到子女身邊，但他於浴室獨處時服過量藥物疑輕生，新何太一邊哭一邊指：「佢後尾頂唔順，成口都係血，佢頂唔順就自己拉開度門，我一睇到，問佢做咩。我走入去，個缸全部係血。嗰時我都唔知點算，我話『你唔可以死，你死咗，第日……你啲仔女嚟搵我算帳』。佢如果真係死咗，我就成咗罪人。」

新何太承擔照顧責任

新何太指，她明白社會有不少人行騙，但堅稱自己對何伯是真心，「有啲人畀人呃咗啲錢真係好慘，但我唔會囉！」何太更表示，會承擔起照顧何伯的責任：「我有一啖飯食佢就有，我唔會畀佢餓親。生意失敗嘅話我都會打工養佢，佢唔使憂喇！」而何伯亦選擇與新何太繼續生活：「嚟咗咁耐，佢服侍我咁耐、照顧我咁耐。呢個老婆真係……證明我冇娶錯呢個老婆啦！」

防止自殺求助熱線：
「情緒通」精神健康支援熱線：18111 
香港撒瑪利亞防止自殺會： 2389 2222
生命熱線： 2382 0000
明愛向晴軒： 18288
社會福利署： 2343 2255
撒瑪利亞會熱線(多種語言)： 2896 0000
東華三院芷若園： 18281
醫管局精神健康專線： 2466 7350
賽馬會青少年情緒健康網上支援平台「Open 噏」：http://www.openup.hk

來源：《東張西望》

更多文章：

Angelababy 離婚2年 首與前夫合體帶囝囝去玩 黃曉明一舉動惹復合揣測！？

張致恒老婆雯雯疑驗出腫瘤！心痛兒子發高燒再入急症 愛犬患癌症