【小小豬】清熱解毒甘草薏米綠豆湯

朋友仔知道小小豬有濕疹，所以就介紹左一個湯水俾我，話對夏天濕熱引起嘅皮膚問題，同埋濕疹搔癢都好有幫助。一聽到對濕疹好，我已經心心眼，再加上煮法又唔難，所以都好想煲嚟試。

係煲之前我都仲有丁點擔心，最後我就去請教相熟嘅藥材店老依個藥坊啱唔啱小小豬，佢都話依三樣材料都係啲清熱解毒之用，咁濕疹都係有幫助。

聽完佢咁講我就安心晒，基本上屋企都有齊材料，所以就即刻煲嚟俾小小豬試下啦！

材料就只係簡單三樣：生薏米、綠豆同埋甘草。今次就先煲兩人份量俾佢地兩父子先(因為我自己本身寒底，唔受得綠豆，所以今次又係有份做冇份食)。所以份量都係較少， 生薏米加埋綠豆大約三分二碗份量。甘草就只需要三片，甘草亦唔可以加太多，因為過量就反而變成有毒，份量剛剛好就最啱~

薏米清熱利濕，綠豆消暑解毒，甘草亦都可以解毒，所以三者加埋一齊煲就可以消暑解毒又祛濕，就算唔係濕疹嘅朋友仔都可以飲呀！

薏米洗淨之後，浸水最少半小時~