東張西望何伯 ︱疑似子女公開宣戰拒養後母？ 新何太隔空反擊：錢一定拿回來

電視節目《東張西望》連日報道76歲「何伯」與年輕逾30歲女士閃電再婚，掀起全城熱話，昨晚（13日）夫婦2人再現身節目，新何太自言看網上評論到凌晨，力斥惡評者：「對我不懷好意先會咁樣踩！」並逐一反擊外界批評及質疑。何伯夫婦一致認定何家子女貪圖父親的家產，不過節目播出疑似何伯5名子女火速在facebook群組發帖「宣戰」，疑似新何太更與他們隔空開火，一眾花生網民都驚嘆事件發展精彩過連續劇。

疑似何家子女與疑似新何太隔空開火：

事緣何伯為這段「忘年戀」跟亡妻所生的5名子女反目，何伯細女更調走聯名戶口中的450萬元，對此網上反應兩極，大部分市民質疑新何太並非出於真心，甚至覺得她是「專業騙子」，亦有人何伯夫婦是真愛。對於被後母公開指摘想爭家產，昨晚（13日）facebook群組「何伯&何伯老婆關注組」流傳一則匿名者發帖，聲稱是何家子女代表發聲：「大家好，本人是何家子女代表，當日從銀行提取港幣四百五十萬款項只為維護我家何姓自身權益，而家父日後的生活所需我們當然會負責到底，至於家父續弦再娶的我們一致表決不會，亦無必要及義務責任供養，如『新何太』有任何異議，歡迎以法律行動解決，而我們何家五子女亦會以法律行動追討在此期間『新何太』向家父所得的所有財產，謹以此平台宣布。」

何伯封鎖子女電話？

對於疑似何家子女公開「宣戰」，網民一致極力支持：「相信香港好幾百萬人都會支持你」、「做得好，非常欣賞你哋，有遠見又處事謹慎」、「你哋做得啱，撐你5兄弟姊妹」、「絕對唔可以令你哋媽咪辛辛苦苦賺嘅錢俾佢呃晒」、「加油，為你哋5兄弟姐妹集氣，正所謂邪不能勝正」等。而另邊廂，有匿名者又自稱何家子女發帖，聲稱無法聯絡父親並公開約食飯：「老竇你封鎖晒我哋電話，我哋先唯有喺度同你講嘢。我哋想約你聽晚食飯啊，如果你ok就whatsapp我啦，我知你知道我係邊個。」然而對於匿名者身分的真實性，仍受網民質疑：「匿名講嘅嘢，只信3成」、「唔係好信真係仔女出post」、「其實呢個匿名參與者係唔係真係『真．何伯仔女』？」。

直到今晨（14日），一名聲稱是新何太的匿名者亦於群組發功，並以簡體字留言：「大家好，我是何太，我看了你們留言感到很傷心，我和我老公是真愛。希望大家別再惡意評論，我絕對不是為了他的錢，錢只是身外之物。但何伯的錢是我們的，絕對要拿回來，女兒這是偷竊行為，為甚麽你們反而支持。錢並不是很重要。但邪不能勝正，錢我們一定會拿回來。」結果再次引爆網民狙擊。此外，不少網民也強烈要求《東張西望》邀請何家子女受訪：「認真，點解《東張西望》關注組唔搵埋5個仔女做訪問呢？兩邊意見都聽吓呀嘛。」

何伯夫婦再度受訪 何伯自認清醒「邊個女人呃我，我一定睇得通」 新何太強調注重名聲：邪不能勝正

而昨晚（13日）何伯夫婦再度受訪一一反擊外界批評及質疑。新何太在鏡頭前重申自己地位：「我名正言順，成為咗合法夫妻嘅話，佢哋就冇咗繼承權。」何伯與新何太槍口一致對外，認定何伯的子女貪圖何伯的家產。

何伯夫婦再度受訪：

何伯Man爆護妻：我當佢哋瘋狗

何伯指近日與太太都有關注外界批評他們的言論，新何太更指看批評她的留言看到凌晨：「對我不懷好意先會咁樣踩我。」何伯更指非常心疼太太被罵：「我愛錫我老婆㗎嘛，你咁樣鬧法，我真係好心痛。」但面對批評，2人更齊心，新何太表示：「當有個好人出嚟講句公道說話又畀人打擊咁，又鬧人哋係咪一夥，質疑佢係嗰個18歲嘅仔，又或者你係咪嗰個肥大陸婆呀！」何伯Man爆護妻：「攻擊我哋嗰啲人，我當佢哋瘋狗。」

何伯再狠批子女貪財

何伯指批評他們的人並不了解他的家事，又再於鏡頭前狠批子女貪財：「佢哋（網民）信晒嗰班反派，嗰5個忤逆仔女，我真係唔會嬲，我嬲……我爆血管啦！佢哋唔識……佢哋唔理解，佢哋知唔知我細女捲走晒我啲錢呢？」對於子女不支持他再婚，他表示：「我帶錯咗佢哋嚟呢個世界，點知佢哋個心咁，攞晒我啲錢走，想我死！根本想我死！咁就佢哋分囉，佢哋5個分囉，450萬，每人分到90萬，個個袋袋平安囉！」新何太指即使何伯娶的是其他女人，子女一樣會反對，因為認為他們只看重何伯的家產，新何太指：「佢娶個女人唔係我，佢哋一樣反對，你信唔信？因為為咗繼承權囉！因為我名正言順，成為咗合法夫妻嘅話，佢哋就冇咗繼承權，所以佢哋咪先落手為強，捲走晒我老公啲錢，等我老公一分錢伙食都冇。」

重溫何伯再婚故事：

新何太有骨氣拒典當靚錶

雖然現時何伯儲蓄只剩4,200元，但有骨氣的新何太為了不令人覺得她為錢而嫁何伯，她出私己錢養起老公，就連老公叫她將手錶典當，她亦拒絕。新何太表示如果她將何伯的手錶典當，何伯子女一定會認定她是騙子：「我頂唔順呀！因為我係好注重名聲嘅人！邪不能勝正！我哋為人正直！我哋會堅持走正確的路。」

何伯夫妻談生意大計

不少網民認為新何太想何伯拿出100萬元做生意，因此質疑新何太的為人，2人解釋本打算用100萬元做飲食生意，何伯表示：「生意有大做大，有細做細。」新何太心有不甘表示：「又話我呃佢錢，又話我會袋嗰100萬落袋，就唔會去創業做生意。」說到何時開始有做生意的念頭，新何太表示：「我哋價值觀係一樣嘅！我都會錫住我老公啲錢，首先攞100萬出嚟先，即係就住就住開支囉！睇吓開唔開到檔。我都想賺多啲錢返嚟同佢一齊享受。」何伯指因為有感新何太仍然年輕，打算讓她做飲食生意：「我就緊係想個老婆生活過得好啲啦，生意做得落去咁佢就唔使憂。」何伯亦坦言有心理準備會虧錢，只是想以100萬元來當試金石。何伯指錢是他賺的，而且非常清醒，不如外界以為他很好騙，更反指銀行跟細女串通，將他戶口內的錢調走。何伯對於外界指女兒是想為他保管積蓄，他反指別人不知內情，「如果保管到我死，咁我點做生意呀，我仲想上大陸發展添！我想上珠海發展！」

新何太大晒流星錘大龍鳳鈪？

新何太：佢哋太膚淺

對於外界質疑新何太看上何伯甚麼、認定她是貪錢的女人，新何太表示：「佢哋太膚淺啦！我咪鍾意佢愛錫我，我覺得幸福囉！佢幾捨得呀，又送呢啲（珠寶），試問有邊個女人唔希望搵到個愛錫自己嘅老公？唔通我老公愛錫我都有罪 ？都要畀啲世人用唔好嗰啲眼光睇佢？應該羨慕我先生先啱！女網民應該羨慕我有個老公錫我先啱，唔係咁樣攻擊我哋，話我呃佢錢，我從來唔呃人一分一毫。」何伯亦自信表示：「根本我就挑通眼眉，邊個女人呃我，我一定睇得通。我10幾歲嚟香港，我跑過江湖，我知㗎！我認為佢老實，靠得住，咁咪娶佢。」新何太指：「就算我老公90歲、100歲，佢都係錫我，我一樣係愛佢。我份人好簡單，我唔理佢年齡幾大，總之佢識得受錫我就得。點解要當人哋獵物呀，我當佢係寶，好唔好？呀……啲人真係奇怪！」

新何太聞兒子的話悲從中來

對於有網民對新何太說：「貪到何伯啲錢，因住冇命享。」新何太表示曾對兒子說：「何伯已經冇錢」，更一度悲從中來：「佢臨老過唔到世，好淒涼，我囝囝就話『我唔讀書，我出去搵嘢做賺錢，返嚟養阿叔』，我好感動。」新何太被主持梁敏巧問到如果450萬元拿不回來，會否打工養家，她表示：「我一定會諗到生存的方法，我老公唔畀我自己出去打工，無論我而家去邊，我都會帶住佢。我或者返大陸擺個地攤檔，喺街邊煎牛扒畀人食我都會帶埋佢。」向何伯許下承諾，2人一同面對往後的路。

新何太直認用A貨 珍珠頸鏈值2萬

最新訪問中，新何太更再次大晒珠寶，包括一對流星錘大的龍鳳鈪。上次訪問中，一身珠光寶氣，手上戴着何伯所送、價值逾13萬元的2卡鑽戒，以及價值逾10萬的勞力士腕錶。何伯亦非常大方地表示：「我鍾意我老婆，佢要咩我都想畀佢。」此外還有珍珠頸鏈、耳環、金戒指。新何太更疑似拎多個名牌袋現身，其中一個更被網民指疑是Hermès罕有款鱷魚皮的喜馬拉雅Birkin，不過大批網民指出疑點，認為是假貨。

對於網民諷刺她炫富、珠光寶氣，身上行頭總值至少36萬，新何太展示其手袋說：「個袋A貨。」至於另一個地圖圖案的手袋，何太表示只是普通牌子、價值約700元；而其他兩個袋亦只是300多元，並指是在內地直播間購買：「啲老闆自己有皮具廠，自己直播帶貨。」新何太同時亦展示上次所戴的珍珠耳環：「呢啲又係A貨，我啲耳環係假，其他都係真。」而上次戴的珍珠頸鏈，新何太表示是在內地購買，是自己以2萬多元購入：「好早買，買咗幾年。」新何太又說：「網民話我值多錢，我荷包邊買到咁貴吖，其實呢啲都唔值錢。」

梁敏巧問到有甚麼是何伯送贈時，新何太即拿出一對流星錘大的龍鳳鈪，梁敏巧見到亦立即「嘩」一聲。何太表示是何伯在今年情人節所贈的定情信物，被問到幾重，何太說：「第一隻就1.8幾（両），加埋可能3両幾，接近4両，都成10萬，99,900。」新何太還甜絲絲說：「我覺得佢咁錫我真係好難得，從未有人咁樣為我使錢。」

獲星島頭條授權轉載

相關報道：

7旬伯「街市飲湯飲出真感情」 認識43歲內地婦1個月 極速再婚 細女疑擔心被騙將聯名戶口$450萬領走

東張西望何伯︱網上瘋傳新何太3大背景 疑3度結婚 傳現避走內地狂呻被抹黑

東張西望何伯︱與43歲內地婦 閃婚 致子女反目 得知妻子承諾養家大讚「冇娶錯老婆」

東張西望何伯︱ 內地妻鏡頭前後語氣大不同？ 小鳥依人感盡失 激動插嘴糾正老公用詞引熱議

東張西望何伯 ︱疑似與新何太茶記撐枱腳 老夫服侍少妻示範越難越愛