顏國樑不敵癌魔離世享年71歲 曾險踏鬼門關3次 獲太太「救命」

曾於TVB經典處境劇《香港81》飾演「陳積」的顏國樑，今日驚傳離世，享年71歲。「老友鬼鬼」的FB專頁留言：「我們痛心宣布，顏國樑師傅已離開我們。永遠懷念你對視界的貢獻，為我們留下過美好的回憶，衷心感謝你！」

顏國樑在2022年罕有現身TVB台慶並自揭患上第三期鱗狀細胞癌導致聲帶失去低音，接受化療及免疫治療後，情況總算穩定下來。早前更與太太霍潔貞接受TVB Plus節目《直播靈接觸》訪問時，提到接受化療及免疫治療曾徘徊在生死邊緣，誰不知今日傳來噩耗。

梁思浩在FB貼上當日與顏國樑和太太霍潔貞的合照並說：收到沉痛嘅消息，顏太講俾我聽：『顏先生昨晚22:30安詳地離開了！』，顏太太節哀順變，你丈夫好痛錫妳，所以我亦幫佢一個心願，佢要同妳留下一個美好嘅片段同回憶！所以嗰日電視台出鏡，佢千叮萬囑我，要將佢太太拍攝得美麗，（因為太太在他心目中永遠都係最靚最溫柔）亦都等你哋兩個喺人生嘅片段裏面有一個最溫馨美好嘅回憶！顏先生一路走好。」

顏國樑的好友鄧英敏接受傳媒訪問，透露顏國樑是昨晚11時多在醫院離世，指他心臟、聲帶及呼吸均有問題，已多次出入醫院，本來計劃昨晚到醫院探望，不過因要會合等另一位朋友，改為今天才探望，沒料昨晚他已離世。鄧英敏稱顏國樑太太雖有有心理準備，但心情都需要時間平復。

憶患癌昏迷險踏鬼門

顏國樑上月曾與太太霍潔貞為梁思浩主持的通靈節目任嘉賓，顏國樑當時曾提及曾入院「續命」的經歷，表示昏迷期間曾有「醫務助理」想帶他走。

節目中顏國樑表現依然非常精靈，精神不錯，他當時曾表示目前身體狀況OK：「做過手術，裏面擺咗支架，會痕，令到我咳，咳嘅時候似怪獸，好嚇人；同埋無電。」梁思浩則表示：「見過咁多次，你今日精神狀態係非常好。」

梁思浩指顏國樑當時經歷15日生死邊緣，前藝人太太霍潔貞四出求助，希望找到方法為老公續命，令梁思浩感到非常感動。霍潔貞表示：「當時醫生同我講，隨時會轉差，佢入院已經昏迷要搶救。搶救咗十零分鐘，醫生行出嚟同我講『而家搶救咗，暫時OK，隨時轉差，要送去深切治療部』。」

霍潔貞透露當時顏國樑已經呼吸困難，要吸純氧氣：「每一秒都好用力、好辛苦呼吸，好似隨時會停止咁，心情真係好驚。」梁思浩又大爆顏國樑與太太在化妝間期間的恩愛舉動，顏國樑大讚太太：「靚過你拍戲嗰時。」逗得全場大笑，又讚兩人是患難夫妻。

霍潔貞透露顏國樑曾經尋找不同方法為老公續命：「我去咗濟公廟搵廟祝，幫佢祈福。裝香、化寶、誠心求拜，佢（顏國樑）平時抄咗啲《心經》，我拎去化咗佢，總之就係做呢啲。」梁思浩此時說：「唔係一定得㗎……」

又透露當時有一個圈中人向霍潔貞透露：「佢過到呢15日就會返嚟，過唔到就無得返，預咗幫佢做身後事。」霍潔貞指當時有朋友跟她說：「會唔會諗下法科方面，我即刻諗起我娛樂圈好朋友，即刻打畀佢，8點幾，問佢有乜可以做，佢叫我第二朝一早去濟公廟裝塔香，呢15日係一個關。」

當時顏國樑提到15日的昏迷與半醒之間的幾個片段：「首先我喺ICU係得兩個人，嗰個人喺度行來行去，我喺張床無奈地睇佢行，佢講電話：『我知，玩梗時差吖嘛，而家係下晝5點幾，唔係10點幾，我知，會過去澳門嗰邊做實驗嘛，我明。』」第二個片段則是老友打電話給他，跟他說：「你俾人整蠱啊，俾人玩梗時差，不過醫院知，會補償返畀你。」

至於第三個的片段，顏國樑則表示較為現實：「到時到候有兩個醫務助理，肥嘟嘟、大媽嗰啲，走埋嚟捉我。我唔畀佢捉，我覺得佢唔係善意，『你好曳啊』，你仲覺得佢係善意？兩個砰砰聲走埋嚟。」顏國樑續指：「當時我郁唔到，俾人綁住咗，佢又捉我唔到，打到隻手啲管甩晒，成床血，畀佢鬧『你好曳啊！你成日郁！』」

雖然顏國樑指當時自己是昏迷與半醒之間，但梁思浩補充指：「喺醫護、太太眼中都係昏迷梗，你見到嘅未必係真實。」梁思浩更說顏國樑要好好多謝太太：「係佢嘅功德，所做嘅一切畀你返嚟，佢只係講咗一句『我唔捨得顏國樑』。我見到你哋咁恩愛，繼續身體健康，有第一次續命，未必有第二次。」

星島頭條授權轉載

更多文章：

蔡一智18歲大女初長成！型格吊帶裙現身生日會 感謝父母養育之恩

感人故事︳愛心社工為解殘障兒童心結 為殘障小朋友度身製作另類公仔