【小小豬】止咳潤肺 桔餅雪梨乾雪耳湯

依幾日小小豬間中都有幾聲乾咳，作為一名慈母梗係即刻去買料煲止咳湯，不過最後就煲左一個潤肺嘅桔餅雪梨乾雪耳湯！

其實當我地藥材店時，只係打算煲啲止咳湯，同老板傾開計，佢問我小小豬係點咳之後，就介紹我煲依個桔餅雪梨乾雪耳湯。

佢話一到夏天，唔好話小朋友，就連我地大人都會成日食雪糕飲汽水，仲要唔凍嗰啲都唔食，所以冷親條氣管兼凍親個肺，就緊係會有乾咳啦！ 聽落又有少少道理，依排小小豬又真係密密食雪糕，次次乾咳都係食完雪糕之後。就連我都有覺得飲完冰凍汽水之後，氣管敏感嘅我又真係好似條氣會唔多順。所以就試下老板提意，煲嚟三口子潤肺暖下氣管。

材料方面就有：瘦肉$60、桔餅兩塊、雪梨乾一兩、雪耳一朵、蜜棗三粒、南北杏一湯匙

做法：

1.雪耳浸洗、去蒂、切細；其他藥材浸10分鐘沖淨；瘦肉洗淨汆水備用

2.煲內放約3L水，水滾後放入所有材料（雪耳除外）

3.待再次滾起時，用大火加蓋煲約15分鐘

4.加入雪耳，再轉慢火加蓋煲1.5小時

5.最後加入少少鹽調味，就可以飲啦

其實之前都分別煲過桔餅、雪梨乾同埋雪耳湯，將三樣材料加埋一齊都好似係第一次，三樣都算甜嘅材料又幾好飲，帶一點點嘅甜品，又有雪耳嘅滋潤，真係唔錯呀！ 唔好再話夏天唔洗飲湯水，因為飲靚湯係冇分時候….應該係話係適當時候就總有一款靚湯啱你飲呀！

更多小小豬的湯水: 

1. 【潤肺又止咳】 鱷魚肉海底椰煲瘦肉湯
2. 【潤喉化痰】 龍利葉雪梨乾桔餅茶
3. 【滋潤養顏】桃膠雪蓮子煲黃耳
4. 【化痰止咳】 海星雪梨湯
5.  龍脷葉石黃皮青欖止咳湯
6. 【美白祛濕】超簡單檸檬薏米水
7.  【潤肺止咳】鮮百合淮山雪梨瘦肉湯
8.  【生津潤燥】海星紅蘿蔔瘦肉湯
9.   【體內排毒】決明子菊花茶
10. 【健脾袪濕】 雲苓白术扁豆衣茶 
11.  【改善失眠】淮山杞子黨參圓肉煲螺頭湯
12.  【消暑袪濕】薏米豬骨冬瓜湯
13.     【消暑消脂】紫背天葵茶
14.  【消暑開胃】香茅檸檬葉水
15. 【清熱袪濕】准山赤小豆扁豆湯
16. 【超甜滋潤 】蘋果百合無花果豬肉湯
17.  【消滯開胃】穀芽麥芽消滯茶
18.  【清熱解毒】 赤靈芝羅漢果茶
19.  【健脾袪濕】 雲苓蓮子薏米南豆黃瓜湯
20.   【零失敗美食】海帶蘿蔔蜆湯
21. 【清熱解毒】 夏桑菊
22. 【清熱祛濕】羅漢果粟米芯茶

作者：小小豬的成長日誌