子女一句話一件事 令父母質疑 英國留學 對與錯｜Samuel Chan

做英國升學顧問，經常用到「離鄉別井」四字，形容小朋友年紀細細就要單拖遠赴 英國留學 ，有時想深一層，這四字睇落難免有點傷感，以致留學搞得好像慘事一樣。

當年年幼，初到英國留學時，我真的有一段時間覺得自己好慘：父母家姐不在身邊、朋友同學仔個個變晒金髮碧眼講英文，連一向嫌我百厭懶得理我的老師，在英國都竟然變做成日微笑、細細聲逐題功課教我做，很不習慣。不過，這種慘持續得不算太耐，大概一兩個月左右，因為更慘的在後頭。

最慘莫過於老師「罰」我和幾個同學鬥快執樹葉，清理運動場。可能被人「罰」得多，執樹葉的慘漸漸蓋過了離鄉別井的慘，之後越執越多，竟然不再覺得難受。現在回想起來，相當佩服當年自己竟然執得完，同時開始get到被「罰」執樹葉的用意——其實只是想幫我放電。

一兩個月的慘，真的算慘嗎？真的咁慘，會有那麼多家長只要負擔得起，都考慮把仔女送到英國留學嗎？我想起一樣經歷過離鄉別井去英國的Eason，有首名曲叫《苦瓜》。