東張西望 丨60歲老婦墮愛情詐騙 亡夫500萬養老金被「語言偽術」騙走
2025-02-17
網上情緣騙案不時發生，騙徒以甜言蜜語展開追求，令受害人稍有不慎墮入騙局，被「語言偽術」偷心及偷金！日前（14日）播出的《 東張西望 》，有一名年過60的Cindy，接獲一名自稱來自台灣男子的「白撞」短訊，最終墮入愛情詐騙。該名男子透過精心設計的照片、密集式的噓寒問暖短訊、甜言蜜語及頻繁關懷逐步贏得Cindy的信任，結果騙走她亡夫500萬元養老金。
年過60老婦Cindy 被甜言蜜語偷心又偷金
年過60的女士Cindy與丈夫結婚多年，並育有一對仔女，不過丈夫多年前因病離世，一對仔女亦已經成家立室，成間屋只得她1人，想不到因為1個電話，改寫她的平淡生活。
Cindy稱在10月初接到一個WhatsApp訊息，聲稱要找一個同學，最初Cindy未有太大戒心，以為對方只不過一時大意：「佢話好抱歉，set錯我個話電話，然後佢就會自我介紹，佢係台灣人，叫Chris，41歲。」
Chris展開貼心訊息攻陷Cindy
其後Chris展開連串的貼心訊息，最終經過一輪狂轟後，Cindy心理防線終於失守，「第二日佢又發訊息畀我，佢問我係咪香港本地人，我話我係呀，跟住問我香港有乜好玩同好食嘅地方，過咗一、二日，佢就話自己返咗台灣，然後發咗張喺飛機上面嘅相畀我，話好抱歉，因為約咗個客，星期六要見個客，然後要趕返台灣，本嚟好想喺香港請我食飯，話我係好優秀嘅姐姐。」
Cindy竟變成每日期待兼習慣
結果這個唐突的訊息竟變成每日的期待兼習慣，Cindy說：「佢朝早會同我講早安，食咗早餐未呀，然後話自己會去食早餐然後返公司，就係傾呢幾句。到中午嘅時候，有時又問我有冇食午餐，都係呢啲普通嘢，到咗夜晚有時又會問我食咗晚餐未，佢會好關心我，好似好到位。然後佢又會下廚煮下餸，佢做乜嘢都會同我匯報，一日都會噓寒問暖，成日都會發訊息同我傾偈，我覺得佢唔似壞人，冇覺得佢有吸引力。」
Chris加插圖像效果相得益彰
Cindy被問是否想交個朋友，她說：「嗰時個心其實又冇諗乜嘢，亦都冇block到佢。」過了不久Chris加插圖像，效果果然相得益彰：「成日都有啲相畀我，等我會記得佢，印象深刻，我睇到佢張相，都ok㗎，係有活力嘅後生仔，我自己可能都睇好佢，所以落咗叠，佢行動性好強，仲好精明人。」Cindy直認由睇相「冇感覺」慢慢變作有好感。Chris再要求Cindy發一張相給他：「我咪話有乜好睇，我係老太婆，你搵啲後生女傾喇。」
Cindy因為一個親密稱號而屈服
結果Chris再將行動升級，Cindy說：「佢話鍾意同啲成熟嘅人傾偈，閱歷多。」Cindy亦發1張相給對方：「佢話好想滿足下，畀咗張相之後，我覺得佢對我有啲牽掛，最多係講『愛你』，不過冇講其他，但係知道佢個心好掛住我，我同佢講忐忑不安，點知佢話情感爆發係控制唔到，想妳都係錯咩？」最後Cindy因為1個親密稱號而屈服：「佢叫我做寶貝、老婆嗰啲，係佢逼我叫，佢掛到我個心好煩，佢話叫咗我做老婆，個心唔使掛得咁緊。」
Cindy堅稱對對方沒有意思
Cindy堅稱對對方沒有意思：「我話鍾意佢做乾兒子（契仔），我做佢乾娘。」不過Cindy的芳心在短短的1個月被攻破，繼而向錢「埋首」，Chris聲稱自己有網店，由誘導Cindy點擊假網站連結開設賬戶，再藉「店主發貨需先支付費用」為理由，要求事主多次轉賬：「最初我都有問呢個平台嘅來歷，佢話係喺韓國賣時裝，家庭用品。跟住佢會提供個銀行號碼叫我入錢，最後又叫我大流量，第一晚係三萬，隔一日又轉五萬，到第三日入咗20萬，我就問佢點解唔係公司名，佢就話人哋生意咁多，咁人多入錢驚混亂，仲限我30分鐘要入錢，如果額大要分開幾個戶口。」
Cindy不足1個月用近500萬入貨
最後在不足1個月時間，Cindy用近500萬元入貨：「平台結算返有125萬美金，我話而家完咗要拎錢，佢就拖咗我兩日，叫我問平台，平台就話我有啲單遲咗，要我畀毀約金480萬港幣。」Cindy轉賬時，銀行職員及警方都曾致電給她：「佢哋話我入啲錢應該係入咗詐騙集團，但係嗰二日又唔得閒同佢哋傾，我都有畀個女睇，佢就話嗰啲電郵同地址都係，我個女話最緊要叫佢畀商業登記，但係佢一路都拖住冇畀。」經過計算後，Cindy將亡夫留給她的500萬元養老金煙消雲散：「屋企人係知，我個仔知道我做呢個平台，仲話第一時間去報警，我而家都未有打算，睇吓警察會唔會幫我攞。」《東張》亦曾聯絡Chris，當然是聯絡不上，Cindy說：「如果佢問我還錢，我叫佢嚟香港搵我，我想佢坐監。」
獲星島頭條授權轉載
即登記成為Oh!爸媽會員，或加入Whatsapp媽媽谷，緊貼第一手親子資訊。
更多文章：
