中年好聲音3丨新手爸 李創偉 罕談照顧仔女 「好辛苦」籲有仔趁嫩生

TVB真人騷《中年好聲音3》一眾參賽者的人氣度大增，其中一人是20強止步的 李創偉 （Catry）。李創偉的性取向成謎，不過他曾自爆與同性拍拖，而且在短短半年間宣布成為兩孩之父，他曾說：「人生不同階段能有不同『任務』和『體驗』…真的很感恩、幸福和不枉此生。#小龍女 #夢想是四個 #但兩個就夠了」不過從未公布小孩的媽媽身份。日前李創偉罕有談到與一對神秘仔女的生活。

李創偉罕談新手爸爸感受

李創偉於2011年參加《亞洲星光大道4 跳舞吧！》奪得季軍後加入亞視成為藝人，不過發展平平，為生計一邊經營舞蹈學校，一邊兼顧幕前演出，曾參加過TVB節目《男神廚房》、ViuTV戀愛真人騷《阿女又戀嚟》等，直到《中3》後終被人認識。不過參賽前夕，李創偉突然高調地宣布自己榮升爸爸。最離奇的是他竟在4個月內成為一子一女的爸爸，一對仔女的身份成謎。日前李創偉接受鍾慧冰「冰姐的花樣人生」的訪問，談到做新手爸爸的感受，李創偉說：「其實好辛苦，真係好辛苦，我而家去到一個階段，係夜晚起搵人，即係起身點解冇人喺度喊。」

李創偉呼籲有仔趁嫩生

李創偉還說：「我係瞓喺地下，隨時佢一嗌就畀隻手佢捉住，我又唔想佢上床跟我瞓，我唔想佢跟我瞓慣咗。反而另外嗰個好快就瞓着，我試過兩個鐘頭餵一次奶，到四個鐘頭一次嘅時候，叫醒佢喊到好似謀殺，我啲屋企人叫我唔好叫醒佢，佢瞓得會好長肉。」不過李創偉在《中3》比賽期間，曾因一件事「癲咗」：「佢哋而家有分離感，佢要搵家長嗰種感覺，我真係癲咗。佢哋而家一歲幾，我真係好開心，記得有仔趁嫩生。」李創偉希望一對仔女長大後，可以做喜歡的事：「不過我唔係好想佢做跳舞呢一行，好多嘢好似行快幾步，死又死先。」

李創偉遇合適對象會結婚

正如當日李創偉早已被淘汰，礙於不可以劇透，所以在朋友面前仍要扮努力：「嗰陣我唔開心咗二日，又唔可以同人講，而且心理仲要好勁，因為呢行係包咗畀人鬧，而家仲係有人鬧先係好事，真係好奇怪，所以我唔係太想佢哋入呢行。」至於會否有單親爸爸照顧而令仔女有缺失？李創偉說：「我覺得唔關缺唔缺失嘅事，我有好多屋企人，而家好多家庭離婚率好高，如果我遇到個啱都會結婚，我爸爸有二個老婆，我媽媽係細，我係大媽湊大，我細過畀阿婆叫『野仔』，難聽嘅說話聽唔少，直到我大個咗，工作有啲成績，阿婆都為我驕傲，有啲結係要自己解。」

星島頭條授權轉載

更多文章：

42歲謝婷婷晒赤裸巨肚宣布懷孕 6歲女兒一舉動極其暖心

黃澤鋒 | 高齡媽媽陳麗麗懷第二胎 小黃妃宣佈做家姐

即登記成為Oh!爸媽會員，或加入Whatsapp媽媽谷，緊貼第一手親子資訊。