高鈞賢 當最強繼父 與太太仔女相處融合 旅行造人一擊即中：我哋好犀利！

41歲的 高鈞賢 離巢TVB後北上發展，去年12月宣佈與圈外女友Christine結婚兼榮升人父。女兒出生後高鈞賢化身女兒奴，經常在社交平台分享湊女日常。近日高鈞賢接受傳媒訪問時指，罕有談及與太太Christine的相識過程，原來Christine曾有過一段婚姻及一對仔女，高鈞賢直言認識對方時已知，更坦言當後父無困難，「當佢哋係朋友，都係叫佢哋叫返我Matthew！」

高鈞賢 與太太Christine飯局相識

去年12月初，高鈞賢突然在網上發布多張婚照及孕照，自爆與年輕10年的圈外女友雙喜臨門。夫妻倆更早已在加拿大註冊結婚，並預告今年1月將首當爸爸。

日前高鈞賢為劇集《刑偵12》接受雷霆881商業一台《星光背後》專訪，首度談及與太太Christine的相識過程，他說：「當時只係朋友約吓食飯，已知道佢細我10年同有小朋友。最初覺得佢好識關心人，又叻又靚又勇敢追夢同識養生。」 高鈞賢指自己未追求過離過婚的女性，兩人認識時他沒想過二人會在一起，直至疫情後兩人才正式了解對方並交往。

去年5月已計劃結婚 心痛太太被公開背景

去年，高鈞賢宣布雙喜臨門不久，就有網民爆太太是富家女及有過一段婚姻的背景，問及太太有沒有受打擊，他說：「畢竟佢唔係圈中人，亦係後生女。所以公布嗰陣，話一定要講清楚細過我10年，其他都唔太理。當然佢有唔開心，我亦有心痛，所以第一時間企出嚟講番件事，好過太多猜測。」

高鈞賢承認他與太太是奉子成婚，他笑稱與老婆「我哋好犀利」，直言兩人沒有浪費任何時間。去年5月高鈞賢生日，Christine籌備了馬爾代夫旅行，兩人本來已計劃結婚，更在這趟旅程「一擊即中」。現時高鈞賢的孩子已5個多月大，而他同時亦是太太的子女的後父，他形容自己與繼子女們的相處融洽，如朋友一樣相處。

和繼子女們相處融合 稱高鈞賢為Matthew

首次做爸爸，便要做「三個孩子」的爸爸，主持人問到高鈞賢跟太太一對仔女相處及做後父有沒有難度時，他說：「由頭到尾我唔覺得難，因為我加拿大長大，有幾個好朋友，佢哋一到weekend就要去stepfather屋企，我反而覺得過程中難嘅係小朋友一方心理調節。我認為大人嘅角色就係要做朋友，我都係叫佢哋叫返我Matthew。同外國人一樣，唔需要迫佢哋叫我爹哋。因為佢哋知道自己爹哋係邊個，佢哋長大後就會有自己方法處理。」

至於現在多了一個5個月大的BB女高子琳（Liona），太太的一對仔女會否擔心偏心？高鈞賢則笑說：「大仔比較懂事，而妹妹始終係女仔，會敏感啲。佢而家成日問媽咪，幾時幫我改姓高。佢會諗好多嘢，想同我而家個囡囡高子琳close啲，呢啲我完全都唔會夾硬迫。總之我會負責返，點樣令大家一齊開心，或者到佢哋大個叫我爸爸，我當然會好高興。」

來源：mattkobe@IG

更多文章：

沈靖韜國際鋼琴賽奪冠｜父親原來是補習天王 爆兒子「最愛打機不練琴」 天才非苦練出來？

幼稚園老師懷孕被指「敗壞社會風氣」 家長斥：可否轉個未結婚嘅班主任？

即登記成為Oh!爸媽會員，或加入Whatsapp媽媽谷，緊貼第一手親子資訊。