【柯豬媽媽】乳酪迷思 : Natural Yogurt vs Greek Yogurt vs Greek Style Yogurt + 好用App分享
2016-08-10
柯豬豬媽食yogurt嘅習慣從廿歲開始(本身唔飲奶) ，得知活性乳酸菌對腸道健康嘅好處就一直食到而家。到做左人阿媽希望培養女兒相同飲食習慣，所以整柯豬嘅點心好多時都會用到yogurt取代butter/cream cheese/sour cream, 健康啲又適合BB食。
最近蘋果新聞出左篇報導關於｢真假｣希臘乳酪 , 令好多媽媽擔心自己買俾bb食嘅到底係咪真正嘅希臘乳酪。對柯豬媽黎講，用邊款乳酪其實都無咩所謂，首選條件沒有添加額外糖份/味道(Plain Yogurt) ，盡量揀原材料愈少愈好嘅牌子(主要係milk, live culture, enzyme等等) ，全脂/低脂/脱脂都Ok。始終乳酪只是BB日常飲食嘅一小部份，有均衡飲食更重要，就算唔從乳酪吸收鈣質同蛋白質，食深綠色蔬菜，芝麻，茄子，蛋，魚肉，豆漿等等同樣可以攝取鈣質。
其次睇用途，例如焗蛋糕時用natural yogurt會易啲同其他材料混合成蛋糕糊，因為質地相對較流質。但如果想用乳酪代替whipped cream做蛋糕上嘅裝飾，揀質地實淨啲Greek yogurt塗抹起上黎更容易 (希臘乳酪製造過程去除更多水份同乳清，所以口感更扎實)。
另外，柯豬媽想講吓近來喜歡使用嘅Android App (相信iphone都有) – Cook Smart營廚，佢係衛生署寫嘅應用程式，入面有好多關於飲食嘅知識和食譜，非常實用。雖然唔係針對BB而設，但可以作為參考俾idea可以點配搭食材同煮法，再自行調節份量煮俾你嘅BB食。
作者：柯豬媽媽