2016-08-18
實不相瞞… 我呢個師奶仔真係好鍾意睇肥媽煮食個節目，因為日日諗煮乜真係好頭痕，依家跟住肥媽煮就得，仲唔係十個正！
睇咗一個星期，都計劃跟煮幾個餸，不過上星期見到呢個黃瓜薏米螺頭瘦肉湯，有我鍾意嘅黃瓜，冇辦法就決定打尖煲呢個先。
我鍾意食黃瓜係其中一個原因，另一個原因就係屋企現成有材材，只係買瘦肉就煲得，咁仲唔即刻快手煲呀！
基本上我都係跟住肥媽食譜嚟煲，唯一唔同就係肥媽係用急凍螺頭，我就改用乾螺頭，因為我之前買咗乾螺頭仲有幾粒喺度，我諗大家都係螺頭，功效都應該差唔多，所以試下啦。(用晒屋企現有嘅就唔使去買…可以慳DD嘛)
材料包括有黃瓜一個、薏米半碗、乾螺頭6粒仔(肥媽用急凍螺頭2個)、瘦肉及薑幾片~
