【小小豬】增強抵抗力 淮山圓肉燉牛肉

依幾日啲天氣真係好似坐過山車咁，突然間急降咁多度，唔好話我地成年人唔習慣，小朋友都真係好難適應。原本都打算快快手同小小豬換啲冬天衫，不過睇天氣報告又話過幾日又會回暖，真係都唔知點做好。幸好依家都叫做屋企有幾套冬天家居服可以頂住，不過其實都係要考慮同小小豬補補身，因為天氣咁大上大落，真係好易病，所以就要增強抵抗力先得。

早前為左增進我嘅BB班廚藝，所以都買左一本專為小朋友而設嘅強身治病嘅湯水食譜，我見入面有一款係較為溫保，可以養血安神，對小朋友發育有幫助嘅湯水，而且又可以增強抵抗力，所以我就即刻趁今日凍凍地買齊材料嚟一個淮山圓肉燉牛肉俾小小豬補補佢啦！

淮山補肺益腎，健脾止瀉，益精補氣；杞子養肝明目；圓肉就益心脾，補氣血又安神；牛肉蛋白質含量高，而脂肪含量低，所以營養就會容易被人體吸收，成為生長發育時做為細胞組織所需要。

小時候嘅小小豬因為濕疹所以戒絕牛肉，依家大個仔啲濕疹都叫做有所改善，所以都慢慢加返啲牛肉俾佢，等佢吸收多啲牛肉所帶嚟嘅營養，希望佢可以唔洗再係咁骨杉杉啦！(我都知要增肥佢係需要啲時間，所以我都努力緊啦….依個亦都係我成日煲湯其中一個原因)

哈哈哈….講返正題先，成日都以為燉湯係好麻煩嘅事，但原來都係好簡單，尤其我係用電子燉盎，真係預埋好晒材料，較好時間就得啦！

今次我都主要係燉俾小小豬一個人飲，所以我用嘅材料就可以燉出嚟就有兩碗左右，材料包括有：牛展約$30、淮山1両、杞子及圓肉約1湯匙、薑片約3片~

牛展洗淨切片汆水；其他藥材用清水浸10分鐘，隔水備用~

將所有材料放入燉盎內~

然後加入面飯碗水(約500ML)~

下頁: 做法