【小小豬】清熱潤肺 合掌瓜螺片豬骨湯
2016-12-11
可能我鐘意煲湯就成為左我俾人嘅感覺，早前好友係大澳玩時買左好多海味，佢專登留左一半俾我，仲親身拎埋上嚟屋企，有此好友真的幸福到一個頂點啦！
朋友帶左啲海星、陳腎、菜乾…等，今次真係可以煲好多靚湯。不過係咁多海味中，我見到有想試好耐嘅螺片，因為成日係媽媽煮食群組都見佢地大讚螺片好，既可以滋陰潤燥之功效，又可以清熱明目。最好就係煲出嚟啖湯會好鮮味，啱晒依家依個天氣飲，所以就即刻買齊其他材料，簡單咁煲返個合掌瓜螺片豬骨湯啦！
材料有合掌瓜3個、紅蘿蔔1個、無花果6粒、螺片2-3片、豬骨$40、南北杏將1湯匙及果皮1片~
螺片先用水浸大約1-2小時，待浸軟備用~
合掌瓜切半去核(我個人就鐘意連皮一齊煲，因為合掌瓜皮都好有益呀)；紅蘿蔔刨皮切件~
豬骨汆水；果皮浸透去囊；其餘材料洗淨~
