【小小豬】西洋菜陳腎紅蘿蔔湯

係街市見到啲靚靚西洋菜，又令我好想飲西洋菜湯，所以就買齊材料煲返一個西洋菜陳腎紅蘿蔔湯！

其實西洋菜湯除左好好飲之外，其實都好有益。西洋菜性涼，含植物性纖維和多種維他命另外，仲有清熱潤肺、助咽喉炎、氣管炎、肺結核、扁桃腺炎及百日咳等的功效。特別屬於燥熱性的咳嗽，療效更為明顯。(網上資料)

加埋陳腎同紅蘿蔔一齊煲，咁就可以清熱下氣、化痰止咳之外，咁就可以滋潤得來而又不寒不燥，啱晒一家大細飲呀！

西洋菜約一斤、陳腎兩個、紅蘿蔔一個、薑兩片、蜜棗三粒、南北杏一湯匙及瘦肉約$40~

西洋菜先用鹽水浸佢一小時，中途最好換兩次水，因為西洋菜係水種植物，一定要洗乾淨啲呀~

紅蘿蔔去皮切塊；蜜棗及南北杏洗淨；薑片拍鬆~

陳腎浸洗最少15分鐘；瘦肉汆水~

煲內加入約3L水，然後加入薑片~

待水滾後加入所有材料，一定要大滾先好加人西洋菜，如果唔係煲出嚟嘅湯就帶點甘苦味呀~

繼續用大火加蓋煲約30分鐘~

之後轉慢火加蓋煲多1.5小時~

最後加鹽調味，就可以飲得啦~

西洋菜真係冇得輸，成啖湯甜都冇朋友，成煲湯轉眼間就俾我地三口子清晒，個個飲到肚仔漲卜卜，真係飲得開心，我又煲得興奮….哈哈哈！

依家係西洋菜當造，所以嚟緊可以煲多啲，等我地又搶湯飲先得！

作者：小小豬的成長日誌