【晴朗天】古法止咳秘方：咸柑桔燉橙
2017-02-09
小病是福！
不過有時小病都會搞到好困擾。
好似上次咁丫！咳咗好耐，西藥、中藥都食過，維持咗個幾兩個月都仲未好番。
咳到搭巴士就算戴住口罩啲人都怕咗我，心情真係極無奈。
最後，上網搵到一個古法止咳秘方——咸柑桔燉橙 ，食咗幾日真係好好多。
唔知係因為已經去到尾聲，定一話係方法見效，不過對過於燉橙秘方深信不已。
過年嘅時候，晴朗全家上下都打敗仗，又想番起呢個神奇嘅方法，一於同大家分享下啦！
材料：
橙 1個
咸柑桔 1粒
做法：
1. 先將橙嘅頂部切開
2. 用匙羹喺橙嘅中心挖一個窿
3. 放入咸柑桔
4. 蓋好頂部
5. 放在小碗上，作用係固定整個橙
6. 放入燉盅內
7. 以中火燉1個鐘零3個字就得㗎喇！
由於時間關係，話咁快就燉好咗！XD 揭開蓋聞到好香嘅橙味，陣陣撲鼻~橙燉到漲卜卜，好juicy呀！*o*
食法：
1. 先飲咗小碗內已漏出嘅橙汁同橙油
2. 然後用匙羹將橙裡面嘅橙肉連橙汁一齊畢出嚟食
3. 最好撈混啲先食，如果唔係某啲部分會比較咸㗎！
4. 每人食法唔同，朗朗就鍾意我幫佢畢晒啲橙肉同橙汁出嚟慢慢嘆
多數人都會用鹽(1/2茶匙)，而唔係用咸柑桔。
但經過上次嘅經驗之後，覺得用鹽味道太怪，而且太咸喇！
用咸柑桔好味好多。
食完之後去瞓覺，竟然成晚都冇咳過，唔再咳到醒嘅日子實在太幸福。
不過日頭又有番啲咳，都正常嘅，佢又唔係仙丹。隨後3日繼續食，夜晚瞓得好咗，日頭明顯咳少咗。之後再食多兩日，就好番晒喇！
好佩服古人嘅智慧，古法嘅嘢，真係不可不信。
大家如果久咳未癒，都不仿可試下啦！
作者: 晴朗天