【小小豬】鮮奶燉花膠

今日跳出自己廚房，轉戰小小豬舅父屋企，因為小小豬就做表哥仔，所以我地就去舅父屋企整鮮奶燉花膠俾舅母食呀！(由於今次唔係自己主場，所以就唔係好習慣，影相就少咗啲啲，請大家見諒！)

鮮奶燉花膠除咗孕婦食係好好，可以有助長胎、產前調理身體之外，花膠都對美顏、增強抵抗力、增強骨膠、氣管及哮喘都好有幫助，所以各位女仕間中都要對自己好啲呀！

其實坊間都有好多方法整鮮奶燉花膠，不過各人做法都有所不同。經我努力上網搜集之後，終於就搵到個簡易方法，所以就試下啦！

整嘅過程好簡單，不過事前功夫就係最困難 – 就係發花膠。

花膠一沾到油就一定發唔起，所以係整個過程就一定唔可以有任何油係附近，所以大家一定要小心，唔係就浪費晒隻花膠啦！

先將花膠用冷水浸過夜，將花膠放入內有薑蔥嘅沸水入面煮約十分鐘，然後熄火焗至水和暖，再換清水浸三至四小時就發好(如果花膠仲未軟身，可以再重新加入薑蔥沸水，重複做1至2次)，(因為發花膠係由舅父負責，所以唔可以為大家圖示，請見諒！)

完成最困難的步驟之後，就可以用四樣材料整鮮奶燉花膠。

花膠一隻、盒仔奶一盒、薑數片、原庶糖少少~

將花膠及薑片放入燉鍋內，然係倒入鮮奶，燉大約1小時~

加入適量原庶糖，再燉多20分鐘，令原庶糖融化就可以食得啦~

由於相對地原庶糖係比冰糖健康，所以我改用咗原庶糖，你知啦….孕婦係唔可以食太甜嘛…哈哈哈！

係依家凍凍地嘅時候食，暖笠笠先嚟感覺都唔錯啦！味道又點，味道唔太甜又帶點薑嘅味道，舅母話好好食呀~

俾小小豬舅母引一引，攪到我又好想試下添，等我搵日又去入貨，之後就燉俾自己食，要對自己好啲先得！

作者：小小豬的成長日誌