【小小豬】小朋友至愛 粟米肉碎西蘭花

為左要為小小豬準備愛心便當，所以我又開始物色一啲啱帶飯又令佢食得開心嘅菜式，第一個諗到嘅就係粟米肉碎西蘭花！其實整俾小朋友食最重要就係健康，同埋要佢自己鐘意食嘅，有齊兩項條件，咁就唔怕佢地唔願食。今次有小小豬鐘意嘅粟米，又有齊肉類同蔬菜類，咁就夠啱健康啦！

材料：

粟米蓉半罐、西蘭花一個、免治豬肉約$15、蒜頭半粒

做法：

1.先將西蘭花切塊，放進沸水稍灼約3分鐘；蒜頭去衣拍鬆；免治豬肉用少少糖及鹽醃最少15分鐘

2.先下油熱鑊，然後加入蒜頭爆香

3.待豬肉炒至差唔多熟時，就可以加入粟米蓉

4.快手將兩者炒勻

5.最後放入西蘭花再炒勻，加入少少糖及鹽調味

呢個餸小小豬都不知幾鐘意食，用啲粟米肉碎嚟餸飯，真係食得特別快！雖然我係為咗整愛心便當先準備呢個餸，不過個份量就係我地三口子晚餐嘅用量，因為小小豬鐘意食，間中煮多幾次又有咩所謂呢！

作者：小小豬的成長日誌