【平價速食】銅鑼灣hmv熱狗$5/$12任加料
2017-05-12
銅鑼灣 hmv 喺開設 hmv kafé 後，已經唔再係簡單 CD 舖。最近 hmv 再增設小食檔hmv dog，打住$5一個熱狗嘅旗號，進駐百德新街名珠城2樓！
要數城中平價熱狗，大家或者都會諗起 IKEA，不過 hmv 嘅熱狗都唔執輸。
小食檔位於2樓嘅 hmv，一出電梯就望到。雖然舖位細細，但都有兩張高枱，可以速速醫肚之後走人。
今次 hmv 出嘅熱狗有兩款，分別定價 $5 同 $12 ，兩款用嘅包係一樣嘅，唔同嘅只係裏面條腸仔！$5 熱狗用嘅係法蘭克福熱狗腸，而 $12 熱狗就用加拿大熱狗腸，可以揀芝士腸或者辣味腸。
同IKEA一樣，熱狗係可以自己免費任加醬嘅，小朋友可以自己揀鍾意嘅醬汁，款式有茄汁、芥末、酸瓜醬同千島醬。除咗醬汁之外，如果你買 $12 熱狗仲可以加埋配料添，配料有粟米、洋蔥同肉醬任加，真係大件夾抵食，小朋友食一舊都夠晒飽。
小食檔仲有Asahi啤酒賣，$15 有 half pint，$30有 whole pint，附近亦設有汽水機。
咁啱路過銅鑼灣又想醫醫肚，又唔想使好多錢嘅，嚟hmv dog就啱啦！