【柯豬媽媽】 我的人奶路 1st checkpoint
2017-08-17
因為妹妹些莉(Sherie) 嘅加入,我哋嘅三人家庭由 5月13日開始變成四人家庭喇,hooray!柯豬榮升家姐!回顧生第一胎跟第二胎所經歷餵人奶嘅辛酸,柯豬媽想跟各位準媽媽/同樣餵緊人奶嘅媽媽分享一下。
2014年尾柯豬出世,生BB前我已經加入幾個母乳 facebook group,加上於網上搵到唔少關於餵哺母乳嘅資料,自以為打咗底,心諗:到時要餵人奶應該唔會好難嘅。事實係我太大安旨意,亦都係低估咗照料新生兒+餵人奶嘅難度,第一胎嘅母乳路只是行咗 1.5個月就草草結束了。
當時喺醫院每 3個小時會有一節餵奶時間,每位媽媽夠鐘就會自行走去育嬰室,姑娘會先將BB交到媽媽手上試埋身食奶,再問你需唔需要補奶粉。當時自己雖然有俾柯豬啜啜,但我知道自己未上奶,柯豬完全飲唔到任何人奶,所以當姑娘問補唔補奶粉,我立刻就話好。依個習慣到出院番屋企之後都係咁做,先埋身後用奶樽補奶粉,由初時 10ml, 慢慢加到 30ml, 甚至60ml柯豬先夠皮。漸漸地,每次埋身食奶柯豬都表現得好懶惰,啜唔到 5分鐘已經瞓著覺,無論係點整醒佢都係瞓多過啜,只有當我轉樽餵奶粉先會好積極咁飲。就好似惡性循環咁,BB愈啜得唔好,媽媽心理壓力愈大,結果奶粉愈補愈多,到唔夠兩個月已經變成全奶粉 BB了。
現在回想,第一胎餵母乳失敗主因:
– 太懶,無嚴格地跟指引每兩小時埋身/泵奶 (奶量不足)
– 太依賴補奶粉
– 太早使用奶樽 (乳頭混亂)