【湊仔爸與返工媽】阿豬戒片記：我信你，但......
2017-09-05
每個家長都有自家的戒片故事。
振奮人心的戒片故事聽得多了，例如「無啦啦自己戒咗片」、「一Ready就三日搞掂」、「日夜片一齊戒冇難度」。阿豬爸媽都幻想，只要一Ready，戒片過程就會路路暢通。
不過，世事豈可盡如人意？請先看阿豬的戒片月程：
四月：嘗試戒片一日後，阿豬爸病了，於是暫緩
五月：嘗試戒片一日後，阿豬病了，於是暫緩
六月：阿豬繼續病
七月：暑假去旅行去Camp，沒時間戒
八月：Fine，我們重頭再來
八月初的戒片進程一開始其實還好。阿豬兩次排尿之間相隔超過一小時，並完全明白我們的指示，願意配合，去洗手間後亦表現得開心。我倆覺得他身心都預備好了，希望今次成功。
這段時間，阿豬每天都只會失手一兩次，但就是沒有明顯進步。我們都告訴自己不要心急。有一天，我覺得阿豬故意在食飯時瀨屎，抹乾淨後又走來瀨尿，又聲稱自己不懂著褲云云，我終於爆發了。先是責備，後是冷戰。有一點戒片經驗的都知道，這樣只會給小孩子徒添壓力（唉）。
順理成章，噩夢來臨。阿豬明知故瀨的情況日趨嚴重，就連出街都無時無刻瀨屎瀨尿。提他去廁所呢，就耍手擰頭，大喊「我冇尿要痾」然後轉頭就瀨。更麻煩的是，阿豬常常表現得嬉皮笑臉冇時正經，連帶刷牙執玩具洗手食飯都故意唱反調，行為大倒退。