【仙妮】BB大考驗～入戲院睇戲！
2017-12-20
丘BB剛通過咗一個大考驗－－－第一次入戲院睇戲！
可能對某D小朋友嚟講睇戲係冇乜難度，不過丘BB貴為乜都驚小姐，
我原本都有心理準備有可能熄燈後2分鐘就要離場，
不過作為阿媽點都要盡量幫吓佢完成嘅～
我覺得今次成功有以下幾個要點:
1）選對戲種
今次睇《小馬寶莉大電影》
原因係平時三個表姐好鍾意喺丘BB面前唱佢D歌🎶
又自創咗隻舞四個會一齊跳～
有時喺屋企丘BB會叫我唱（當然我唔識~_~）
所以會開YouTube俾佢睇
於是就係咁佢對My little pony 有一定認識喇！
2）選對Partner
同邊個睇係好重要！！
相信得阿爸阿媽係唔夠嘅～
所以要搵一啲可以學習嘅對象
今次當然係同3個表姐睇啦～
佢見到表姐乖乖咁坐定定睇
自然會有樣學樣啦～
3）預先要俾定心理準備
預早兩日得閒就同丘BB講會同表姐睇戲，
「會好黑㗎！不過唔使驚～因為睇Pony 你會好鍾意㗎！」
加上事前俾trailer 佢睇都會有幫助！
4）用Hip Seat
丘BB唔使買飛所以冇位坐，
所以我預備咗hip seat 俾佢等佢可以舒舒服服坐高D，
同時攬住佢可以俾到安全感佢！
5）預備小食
如果可以就預備一、兩樣BB小食俾佢，
如果佢唔耐煩都可以keep佢坐耐D嘛！
全套戲99分鐘，
雖然尾段有D坐唔定，
不過對於一個19個月大嘅BB，我已經好surprise 能夠完成今次大考驗喇！
作者：仙妮
其他文章：