【小小豬廚房】至啱秋天飲的清心潤肺靚湯
2015-10-12
今日又黎煲靚湯時間，上網睇朋友仔介紹，話可以健脾益胃兼清心潤肺，超級啱秋季飲，所以就買齊材料，煲返個木瓜蘋果雪耳芡實薏仁瘦肉湯啦！
材料有：木瓜1個、 蘋果2個、雪耳1朵、薑2片、蜜棗3粒、瘦肉約$40。薏仁同芡實就去藥材店同店員講大約幾多人飲，佢就會幫你執份量啦！
木瓜及蘋果洗淨後削皮切塊：
雪耳浸軟剪切塊：
瘦肉洗淨汆水備用：
煲內放約2L水，然後隨水加入2片薑：
待水滾後加入所有材料，先用猛火煲半小時：
之後轉細火煲一小時：
最後加鹽調味，就飲得啦！
可能本身我係鐘意食煲湯木瓜，所以呢個湯我真係非常鐘意，啖湯飲落好潤之餘，啲木瓜又好食，真係十個GOOD呀！
唔止我… 小小豬都話好好飲，仲飲左兩大碗添！除左飲湯之外，佢仲記得我講過食左雪耳會靚仔，所以佢真係食左好多，差唔多成朵雪耳都比佢食晒呀！
雖然雪耳係好味又有益，不過都要再提多大家煲過的雪耳一定要即日食/飲晒，因為如果隔夜，經過一夜的浸透，佢就會釋出一啲有害物，到時就有益變有害啦！
作者：小小豬的成長日誌
文章獲作者授權轉載