【柯豬媽媽】氹小朋友開心的小食 豆腐蛋撻（1.5歲以上幼童食譜）
2018-02-07
相信好多人都鍾意食蛋撻，但街外的蛋撻多數糖份太高，不如媽媽自己喺屋企整，小朋友一定會好鍾意㗎！
撻皮：
低筋麵粉 100g
無鹽牛油 50g
蛋黃 1隻
蛋漿：
蛋白 1隻
滑豆腐 50g
水/豆漿/人奶/配方奶/鮮奶 約100ml (視乎撻模高低，可以倒幾多蛋漿)
用具：
撻模6隻，篩子
1. 首先做撻皮，將無鹽牛油切粒，加到裝著麵粉的大碗內。用手指將牛油跟麵粉一起捽，將乾粉捽成黃色泥沙狀態。
2. 加入蛋黃，盡快將所有材料揉成麵糰，用保鮮紙包好放雪櫃雪30分鐘。(雪硬些少，之後易操作)
3. 滑豆腐用匙羹壓過篩，混合蛋白及奶，再過一次篩，將大塊的雜質去除。(這個步驟很重要，唔過篩蛋撻會唔滑㗎！)
4. 預熱焗爐180°c。
5. 取出麵糰，分做6小份 (約30g)
6. 將小麵糰放喺已掃油的撻模中間，用指腹輕力向四周壓開，直到可以覆蓋整個模，盡量厚薄均衡一點。
7. 每個撻倒入8成滿的蛋漿，準備好就可以入焗爐。轉下火，先將撻皮部分焗熟，約10-15分鐘。
8. 當見到撻皮外圍有點金黃色，轉上火，減至160°c，將已經半熟的蛋漿部分焗熟，約5-10分鐘。
9. 當蛋漿部分凝固，代表蛋撻已經可以出爐啦！！
PS. 這個recipe是寫嚟俾較年幼的小朋友食，所以完全無糖，如果想做俾年紀大一點的孩子，爸媽可以適量地加少量糖，令成品更加香甜。
作者：柯豬媽媽