【葉偉麟】缺點無極限?
2018-08-22
七歲男童, 家中排行第二, 哥哥和弟弟都屬於聰明和乖巧, 可惜自己卻做事衝動、粗心大意、更會動手打別人及說髒話, 經常遭學校師長投訴, 父母都非常生氣。後來經過評估，確診患上 ADHD Attention Deficit Hyperactivity Disorder 專注力不足及過度活躍症。
家長:「佢無樣嘢做得好架, 上堂遊魂發夢, 成績差不在話下, 唔係帶漏嘢就又唔見嘢! 做錯嘢又唔認, 又講大話, 賴呢樣賴個樣! 佢間房亂到不得了, 好心提醒佢, 佢又會鬧返嚟你轉頭, 搞到你頂唔順鬧佢, 叫佢學下哥哥弟弟, 佢仲講埋粗口, 郁手郁腳打人添呀, 上個禮拜篇周記，佢竟然寫「打死我細佬就最開心！ 真係冇哂佢符。」
我：「聽你咁講, 咁佢似乎都幾多「缺點」, 搞到你好勞氣唔鬧都唔得。」
家長:「佢錯少陣我都求神拜佛啦! 」
我:「咁哥哥同細佬情況又係點呢? 」
家長:「佢哋乜都好, 讀書聰明, 做嘢自動自覺, 又有自信, 唉…. 真係十隻手指有長短!」
我:「讚哥哥同細佬似乎好容易, 因為有太多優點, 數極都數唔完……咁二細佬有冇咩優點?」
家長：「下? ?唔係啩? 我真係唔覺有!」
我:「相對之下, 你「選擇」睇到哥哥同細佬嘅優點, 多過二細佬。你估下, 二細佬內心想唔想你讚自己? 」
家長:「咁就梗係想…..不過都要讚得落先至得架!」
我：「你覺得二細佬啲「行為問題」, 似係 ATTENTION SEEKING行為多啲? 抑或受到ADHD既影響？」
家長：「我估兩樣都有嘅……..我哋成日喺佢面前讚哥哥同埋細路, 又真係搞到佢都想爭寵，有時針對細佬……其實, ADHD係咪無得救架喇？」
我：「假如你要求一條魚爬樹, 咁條魚只會成世覺得自己好無用。每個小朋友都係獨特嘅, 只是視乎有冇將佢地擺啱位, 發揮到佢哋嘅優點出黎。」
家長有點語塞。