【80後手作媽媽】整跌杯可樂的小孩
2019-11-12
最近同小Sheryl去街街，在街上遇到一件事，很想跟各位爸爸媽媽分享一下。
事緣就係有一位小朋友，我估佢大概6-8歲左右，在M記買咗嘢食外賣，手拿住杯可樂好興高采烈咁諗住準備去食，點不知一唔小心甩手，成杯手上的可樂就跌咗落地，當時吸引咗我目光睇下發生咩事。然後，個小朋友嘅爸爸好嬲，企咗喺度，用好惡的眼神厲住個小朋友，一路唔出聲，厲實佢，個小朋友個樣好驚，想喊又唔敢喊，郁都唔敢郁，個爸爸就一路企係度厲住佢，咩都唔做，完全無意識係要抹番乾淨個地下，而隔離仲有個細佬同媽媽都無出聲，全部人一起厲住個小朋友，我又留意下細佬，佢都好驚痴實呀媽唔敢郁，就係呢個定格，足足定咗成10分鐘。。。然後，小朋友開始想走去呀媽度，呀媽就唔理佢，然後呀爸就開始開Turbo鬧個小朋友。。。
我真心覺得好Crazy! 心諗其實洗唔洗咁呀？個小朋友唔係犯下離天大罪，佢只係唔小心甩手跌咗杯可樂!!
當然，雖然我係好唔認同呢位爸爸點解要咁嬲，但我都唔會上前去干涉。只係，呢件事讓我反思一下，如果第日我的小朋友有咁嘅情況，咁我又會點處理呢?