【和牛b的成長日記】二寶孕記︳懷二胎嘅勇氣 | 係愛 x 陪伴成長 x 手足之情
2020-01-07
生咗和牛B相隔4年,點解我會再有勇氣挑戰生多一個BB呢?
其實我都掙扎咗好耐……出生於大家庭嘅我,我喺家中排行最細,對上有一個哥哥、兩個家姐。 所以,可以話我自細就係一個小社區長大,同埋有好多人愛錫自己。但呢一點都唔係令我鼓起最大勇氣,讓和牛B成為家姐,有弟/妹嘅主要原因。和牛B身邊有好多同齡好朋友,朋友圈嘅朋友都陸續成為哥哥、姐姐。 令佢開始更加渴望,自己都有弟/妹。
所以,和牛B就開始經常同我哋講想要妹妹,想我生個BB俾佢。佢足足講咗一年,令我產生一種感覺係「唔生一個弟/妹俾佢,會欠佢一世」。 當時嘅和牛B,幾乎每隔一兩日就會同我講「我好想要個BB」、「媽咪,你可唔可以生一個BB俾我」。 然後,你見到佢抱起屋企嘅公仔當BB咁湊,又會覺得……佢真係好想做姐姐。
到我終於成功受孕,和牛B嘅開心、興奮程度,係遠遠超乎我同牛爸嘅想像之內,佢同我哋講「媽咪,多謝你為咗我生BB」。 而和牛B幾乎每日都會攬住我,錫我個肚。 佢每日都會同BB傾計,每次都會好期待陪我去做產檢。佢仲不停話我知,佢將所有最好嘅嘢都要俾晒妹妹。