【法律常識】面對麻煩租客，業主應該怎樣做？│蘇文傑律師

人人都知香港樓價好高，所以唔少人都會選擇租樓，而業主們就可以每個月坐定定等收租。不過相信所有業主最驚嘅就一定係遇到麻煩租客，例如：長期拖欠租金、成日整壞傢俬電器要求業主出錢維修、單位再被分租、又或者將間屋住到好污糟，甚至影響到鄰居惹人投訴！面對麻煩租客，業主可以點算呢？

業主可以根據租約追討賠償或採取相應嘅法律行動。一般租約內容包括業主及租客雙方協定嘅權利同責任，例如：雙方資料、租金及繳交日期、租約年期，以及其他相關條款。假如雙方出現糾紛，可以透過土地審裁處處理，如果糾紛只牽涉金錢，例如業主想追討欠租，而且金額少過五萬元，業主就可以透過小額錢債審裁處進行訴訟索償，但如果金額超過七萬五千元就要入稟⚖️區域法院或高等法院追討，假如情況嚴重，業主想收回物業，亦可以向土地審裁處遞交申請收樓書，不過需時較長⏳。

大家除咗留意租約，亦可以留意下大廈公契，大廈公契訂明咗業主之間、發展商和經理人嘅⚖️權益同責任，內容指明大家享用大廈嘅公用地方或設施，例如：升降機、大堂、花園⛲、會所等要遵守嘅規例，而其實大廈公契除咗對業主有法律效力，同時對租客亦可能有約束力，所以假如租客違反咗大廈公契，例如：喺不得飼養寵物嘅大廈飼養寵物、佔據大廈走廊通道等，就有機會要承擔法律責任，不過喺唔同情況下可能都有所不同，而且每棟大廈嘅大廈公契都未必完全一樣，所以大家應該因應相應嘅大廈公契同埋個別情形作出判斷或者諮詢專業法律意見。

遇到麻煩租客的確令人頭痛，所以各位業主喺一開始揀租客嘅時候就要多花心思，可以留意下租客嘅職業或背景，同時，業主應該要保存好租金紀錄，以便日後有機會要透過⚖️法律途徑追回租金。

作者：蘇文傑律師