湯水食譜｜益氣補血+補腎補腦 節瓜章魚合桃湯 | 小小豬 Kinsey

早幾日去西貢玩嘅時候，路過碼頭附近見到好多小艇店，八八卦卦咁去望望，就係咁見到有一包包靚嘅章魚乾，聽好朋友仔講章魚乾都係好有益，所以就入手一包嚟試下煲靚湯。

係我唔知點煲嘅時候，當然要去搵高手教路，所以去問相熟藥材店東主，佢教我加埋節瓜同埋合桃一齊煲，可以健脾補腦，啱晒我家嘅大小老闆呀~

章魚乾一隻、節瓜兩條、淮山一両、湘蓮一両、蜜棗三粒、陳皮一角、合桃一飯碗 ~

章魚洗淨切件，然後浸至軟身~

節瓜去皮切件~

合桃及其他藥材洗淨後浸洗一陣~

陳皮浸軟後刮瓤~

煲內放約3L水，然後隨水加入陳皮~

待滾起後，就可以加入所有材料~

繼續用大火加蓋煲約15分鐘~

之後轉慢火加蓋煲多2小時~

最後加少少鹽調味，就可以飲得啦~

以下係各食材嘅功效，可以參考一下呀(網上資料)

章魚乾 – 具有益氣補血及健脾功效，而且含豐富蛋白質。

節瓜 – 具有清熱、清暑、解毒、利尿及消腫等功效。

合桃 – 有補腎補腦、健胃補血、潤肺養神功效。

淮山健脾開胃，其他好處為治療久泄久痢、肺氣虛燥、及消渴尿頻等症。

湘蓮補脾止瀉，益腎澀精，養心安神。

蜜棗止咳潤肺、化痰平喘功效。

陳皮理氣健脾、燥濕化痰。

溫馨提示：
– 由於個別人仕體質不同，所以大家記得煲之前了解下自己，如有疑問，請先向註冊中醫查詢！

作者：小小豬 Kinsey

其他閱讀：

【湯水推介】滋補助發育 太子蔘田七螺片烏雞湯 | 小小豬 Kinsey

【湯水推介】養陰潤燥清肺熱 雪梨乾玉竹淮山茶 | 小小豬 Kinsey