培養閱讀習慣│點樣堅持7年唔俾小朋友玩電子產品?│小周董世界

好多朋友都知我屋企好變態，就係無俾電子奶嘴小朋友的習慣，小周董已7歲除咗而家要上zoom堂同做功課，其他時間佢都無用電話/玩iPad，好多朋友問我究竟點做到？ 究竟呢個年代唔俾小朋友玩電子產品，佢哋會變成點？ 無電子奶嘴有咩好處同壞處？ 今次想用2篇文章同大家分享我呢7年來的親身經歷 ^^

究竟點做到戒掉電子產品？

第一步：堅持…. 亦都係最重要的一步。我同老公由決定生小朋友前已有共同理念係培養小朋友閱讀習慣。睇得多TV、iPad同電話，畫面太豐富有比較之以下拎起本書點會吸引？所以大小周董2歲前，我們家係完全無開過部TV，直至3歲後每天才有半小時TV TIME，每天堅持有STORY TIME，除咗令到佢哋唔怕拎起本書，亦有效提升親子關係。

出街堅持一定要帶住2本書、幾張白紙、同幾枝筆，不論出街食飯等食中都可以看書，坐車亦可以用紙筆玩小遊戲，雖然拎部電話俾佢哋成餐飯真係會容易好多，但我係WORKING MOM，我會當呢個都係我同小朋友的親子時間，只要父母肯同佢哋一齊睇一齊玩，要相信小朋友一定係鍾意爸媽多過部電話。

第二步要同小朋友有多D不同活動，無電子產品小朋友一定會較悶，所以同佢哋可以出去玩多D或者做吓運動，發洩下多餘精力。平時如果坐車長時間，腦入面要諗定一D用把口/用隻眼可以玩的小遊戲，例如簡單的中文字接龍，鬥講不同顏色/形狀東西，鬥快搵到10架黑色車等等。

第三步父母要作好榜樣，想小朋友唔玩電子產品，自己首先要先戒掉(當然我明白係好難….我意思係在小朋友面前戒掉 ^^” )。 我都唔記得自己幾多年無睇過電視劇集，有時有D節目好想睇，我同爸爸都會等小朋友瞓晒 10 PM後才開場。另外，大小周董係男仔特別鍾意模仿爸爸，所以爸爸的堅持同陪伴係十分重要，本身爸爸鍾意睇書同做運動，大小周董亦都有受到感染，有樣學樣係真架，所以身教真係好重要。

其實好多人話好難唔俾電子奶嘴小朋友，我原本覺得唔好俾佢開始就唔需要去戒掉，可惜今時今日小朋友一定要透過電腦返學做功課，逃唔過一定要使用電子產品，但亦都係因為每天己經有幾個鐘走唔甩，所以其他時間更加需要控制小朋友使用時間，其實回想番早20年前完全無電子產品，我們都係一樣開心地成長，所以父母 堅持 真係好重要，少D電子產品，屋企人多咗真正相處，關係點都會CLOSE D、開心D…呢樣肯定係真嘅，所以一定一定一定要堅持啊 ^^ (#重要的事要講3次 )

下一篇我會同大家分享大小周董這些年來無電子產品係玩咩嘅呢？大家如果都想同我分享你的經歷，歡迎加我FACEBOOK同IG，INBOX同我開心SHARE啊 ！

FB: 小周董世界

IG: 1437rita

作者：小周董世界