【80後媽咪】溝通比一切重要
2016-05-04
感恩，近呢半年，細佬嘅情況好轉咗好多
佢開始識得用言語去表逹到自己啦…
呢四年以嚟，一個唔識講嘢嘅小朋友，一個不了解細佬的我
大家溝通唔到，佢一直都用狂喊嚟表達自己的感受
其實，大家都好辛苦啊……
細佬自從返學之後，就進步咗好多
又好好彩啦，坐細佬隔離嗰位小朋友正正係說話能力好強嘅人
亦都比較熱情，比較多嘢講，
可能咁，就溶化咗細佬啦
佢哋兩個，依家變得非常咁好老友啊
見到細佬 開始有社交
唔再咁自閉，真的超開心
希望， 細佬佢大啲又會好啲啦!
自從細佬表達到之後
我哋就多咗傾偈
我個人本身， 其實係偏鍾意講嘢的
一向都係停唔到口嗰種
我所以，好鍾意，亦都好享受同佢地傾偈
會講下佢哋返學嘅事啦
好似昨日咁，我出咗街，爸爸湊
又會問下佢哋，爸爸有冇掛住玩電話，唔理你哋呀？
食過乜，玩過乜，有冇好事發生諸如此類
總之就係，乜都講一大餐
多咗溝通，細佬亦都黐我多咗
以前搭車，佢會坐喺嘅車度，粒聲唔出，自己睇風景
依家，唔同晒啦
佢會坐我大髀仔，同我傾下偈，玩下笑下
真心覺得，溝通真的好重要
仲記得以前，可能我媽媽比較忙啦
佢一個湊四個，我細個嘅時候又好靜嘅
媽媽好少同我傾偈架
係大下大下，我鍾意咗傾偈，先同媽媽多嘢講咗咋
有時啲嘢，我覺得好相向
你同佢分享，小朋友就會一樣，同你分享心事
然後，大家就會變得愈來愈緊密吧！
如果你掛住不斷玩電話，唔理小朋友，花好小時間同佢溝通
可能佢哋大個，就係一樣，掛住玩電話，唔理你啦
聞說去到中學階段，小朋友就會好受朋輩影響
到時，佢哋會唔會將自己嘅事情同你分享
我覺得都好建基於今日你多唔多同佢溝通
其實，小朋友學唔學壞
屋企真的好梗要
希望大家都少玩電話，多啲聆聽小朋友心聲！