【小小豬】大個仔畢業啦 - 香港公園外影

話咁快小小豬就K3畢業，為咗紀念人生第一次畢業，於是同佢去香港公園影輯靚相啦！

其實最初我都冇依個打算，不過見學校出咗張通告叫我哋交錢去幫學生影畢業相，呢個時候我就開始諗：小小豬平日喺冇特別引佢嘅情況下，影相都係目無表情多，到影畢業相嗰日都唔會影得靚啦！

就係呢個念頭，我就好似「叮」一聲咁諗到，不如買件畢業衫自己同佢去影，始終由我自己親自操刀，最知道小小豬喺咩環境下係影得最靚同啱我心水嘛！

為咗今次影畢業相，我就破戒去淘寶買咗件畢業衫，趁着今日小小豬畢業禮總綵排改番上午班嘅時候，放學去香港公園影畢業相。

我哋有諗過好多地方都好啱影，不過最後我都係決定嚟香港公園嘅主要原因係…….因為我哋係喺香港公園入面嘅紅棉路婚姻註冊處註冊，所以呢個地方對我嚟講都幾有意義，所以我吔第一個畢業相外影就嚟呢度啦。

放學時落雨，都有一刻擔心唔到影相，好在天公造美，我哋食完午餐之後已經冇落雨，而且仲開始有少少陽光，所以當然即刻GO GO GO啦~

可能小小豬知道畢業好重要，所以佢非常合作，唔使點引佢都可以都笑得幾靚仔呀~

香港公園個景又真係唔錯，呢個茶具博物館外面都已經係一個靚位啦~

仲有一個大水池，影出嚟都唔錯呀~

我全日至愛嘅位置，就係呢個小瀑布，我影完之後好多外藉人仕都跟我影呢個位呀~

就嚟奧運，當然要入去奧運廣場影個奧運五環啦~

呢個小位置係小小豬提議，佢話有小花又有小水好靚咁話喎，當然係因為佢提議，所以影得特別開心，笑得特燦爛呢~

最後我哋去睇雀仔之前，再影多兩張正經啲嘅~

今日小小豬真係狀態大好，所以絕大部分都係影得好靚，笑得好開心，而我亦都好有滿足感！

原本我都有打算帶埋腳架，不過…放學直去，又要拎衫又要拎書包，仲要得我一個人，所以最後都放棄，有少少美中不足就係冇同小小豬影到合照。

不過唔緊要，既然買咗件畢業衫，就即係幾時都可以去影，我為小小豬準備咗嘅畢業BEAR BEAR都未出場。有咗今次成功嘅經驗，嚟緊應該會再去唔同地方影多啲畢業相，到時再影多啲合照/家庭照先得！

作者：小小豬的成長日誌

**我地嘅FACEBOOK FAGE，唔知大家LIKE咗未呢？大家一齊嚟交流下煮飯仔及去玩嘅親子樂啦：https://www.facebook.com/kinseymama**