【小小豬廚房】健康早餐 - 香橙燕麥乳酪杯
2016-05-31
平日小小豬嘅早餐都係一杯奶或者再加個麵包,其實都有少少悶,今日就嚟攪攪震,轉個新口味,同佢齊齊整個香橙燕麥乳酪杯,食一個快靚正嘅健康早餐啦!
我都係因為上次參加新奇士橙嘅EVENT,喺席上跟林德信學整個呢個香橙燕麥乳酪杯。嗰日食又覺得原來橙加乳酪味道幾夾,再加上食咗啲燕麥方塊又幾飽肚,所以就同小小豬齊齊整啦!
其實當日都用咗幾款唔同材料,不過我哋喺屋企自己整,所以就簡單啲,只係用香橙、燕麥方塊同埋低脂乳酪嚟整啦~
第一個步驟就當然係搣橙,為咗訓練小小豬嘅手指力,我開咗個頭之後就交俾佢接手搣埋下半場,又好似得得哋,只係個橙皮唔多靚呀~
之後個做法都好簡單,係杯底鋪上一層燕麥方塊,之後加上乳酪,再喺上面鋪一層橙肉,再淋乳酪~
然後重覆步驟直至覺得份量足夠就可以食啦~
之前都有試過俾燕麥方塊加牛奶俾小小豬食,不過佢就唔多肯食(話唔好食哦)。但今次加落咗乳酪佢竟然話好味,仲不停咁要添加,原來改變少少就可以有唔同收獲呀~
小小豬仲話非常好食,叫我下次都俾佢整呢個早餐,但….佢提議將橙改為藍莓,話佢最鍾意嘅水果係藍莓。
其實…..計我話….係佢怕咗搣橙就真,不過小小豬又冇講錯,又真係可以改用其他水果,咁下次就順下佢意買藍莓,等佢食得更加開心啦!
作者:小小豬的成長日誌
**我地嘅FACEBOOK FAGE,唔知大家LIKE咗未呢?大家一齊嚟交流下煮飯仔及去玩嘅親子樂啦:https://www.facebook.com/kinseymama**